Read nynorsk 2011 2. Kongebok 15 Bible Online

2. Kongebok 15 - nynorsk 2011 bible

2. Kongebok 15

¹[40] I det tjuesjuande året Jeroboam var konge i Israel, vart Asarja, son til Amasja, konge i Juda.

²Han var seksten år gammal då han vart konge, og han styrte i Jerusalem i femtito år. Mor hans heitte Jekolja og var frå Jerusalem.

³Asarja gjorde det som rett var i HERRENS auge, heilt og fullt som Amasja, far hans, hadde gjort.

⁴Men offerhaugane vart ikkje nedlagde. Folket heldt fram med å ofra og brenna offereld på haugane.

⁵Men HERREN rørte ved kongen slik at han leid av ein hudsjukdom heilt til sin dødsdag. Han budde i eit hus for seg sjølv, og Jotam, son til kongen, styrte slottet og folket i landet.

⁶Det som elles er å seia om Asarja og alt det han gjorde, står skrive i krønikeboka til Juda-kongane.

⁷Asarja gjekk til kvile hos fedrane sine. Han vart gravlagd hos fedrane sine i Davidsbyen, og Jotam, son hans, vart konge etter han.

⁸I det trettiåttande året Asarja var konge i Juda, vart Sakarja, son til Jeroboam, konge i Israel. Han styrte i Samaria i seks månader.

⁹Sakarja gjorde det som vondt var i HERRENS auge, slik fedrane hans hadde gjort. Han heldt ikkje opp med dei syndene som Jeroboam, son til Nebat, hadde fått israelittane til å gjera.

¹⁰Sjallum, son til Jabesj, fekk til ei samansverjing mot Sakarja. Han slo han i hel så folket såg på, og vart sjølv konge etter han.

¹¹Det som elles er å seia om Sakarja, står skrive i krønikeboka til Israels-kongane.

¹²Det gjekk i oppfylling, det ordet som HERREN hadde tala til Jehu: «I fire ledd skal sønene dine sitja på Israels trone.» Og slik vart det.

¹³[41] Sjallum, son til Jabesj, vart konge i det trettiniande året Ussia var konge i Juda. Han styrte i Samaria ein månads tid.

¹⁴[42] Då drog Menahem, son til Gadi, opp frå Tirsa og kom til Samaria. Der slo han i hel Sjallum, son til Jabesj, og vart konge i hans stad.

¹⁵Det som elles er å seia om Sjallum og samansverjinga han fekk i stand, står skrive i krønikeboka til Israels-kongane.

¹⁶[43] Så øydela Menahem Tappuah og alt som var i byen, og områda ikring heilt til Tirsa. Fordi folket ikkje hadde opna porten for han, herja han byen og skar opp alle kvinner som var med barn.

¹⁷Det var i det trettiniande styringsåret til Juda-kongen Asarja at Menahem, son til Gadi, vart konge i Israel. Han styrte i Samaria i ti år.

¹⁸Menahem gjorde det som vondt var i HERRENS auge. Så lenge han levde, heldt han ikkje opp med dei syndene som Jeroboam, som til Nebat, hadde fått israelittane til å gjera.

¹⁹[44] Assyrarkongen Pul gjekk til åtak på landet. Då gav Menahem han tusen talentar sølv for at han skulle støtta han og tryggja kongsmakta hans.

²⁰[45] Sølvet til assyrarkongen kravde Menahem inn frå alle velståande israelittar, femti sjekel frå kvar. Då trekte assyrarkongen seg tilbake; han vart ikkje ståande i landet.

²¹Det som elles er å seia om Menahem og alt han gjorde, står skrive i krønikeboka til Israels-kongane.

²²Menahem gjekk til kvile hos fedrane sine, og Pekahja, son hans, vart konge etter han.

²³I det femtiande året Asarja var konge i Juda, vart Pekahja, son til Menahem, konge i Israel. Han styrte i Samaria i to år.

²⁴Pekahja gjorde det som vondt var i HERRENS auge, og heldt ikkje opp med dei syndene som Jeroboam, son til Nebat, hadde fått israelittane til å gjera.

²⁵Våpenberaren hans, Pekah, son til Remalja, fekk i stand ei samansverjing mot Pekahja. Han hogg ned både han og Argob og Arje i Samaria, inne i borga i slottet til kongen. Pekah hadde med seg femti mann frå Gilead. Då han hadde drepe Pekahja, vart han konge i hans stad.

²⁶Det som elles er å seia om Pekahja og alt han gjorde, står skrive i krønikeboka til Israels-kongane.

²⁷Det var i det femtiandre styringsåret til Juda-kongen Asarja at Pekah, son til Remalja, vart konge i Israel. Han styrte i Samaria i tjue år.

²⁸Pekah gjorde det som vondt var i HERRENS auge, og heldt ikkje opp med dei syndene som Jeroboam, son til Nebat, hadde fått israelittane til å gjera.

²⁹[46] På den tid Pekah var konge i Israel, kom Tiglat-Pileser, kongen av Assur, og tok Ijjon, Abel-Bet-Maaka, Janoah, Kedesj, Hasor, Gilead og Galilea, heile Naftali-landet. Og han førte folket bort til Assur.

³⁰Då fekk Hosea, son til Ela, i stand ei samansverjing mot Pekah, son til Remalja. Hosea slo han i hel og vart konge i hans stad. Dette var i det tjuande året etter at Jotam, son til Ussia, vart konge.

³¹Det som elles er å seia om Pekah og alt han gjorde, står skrive i krønikeboka til Israels-kongane.

³²I det andre året Pekah, son til Remalja, var konge i Israel, vart Jotam, son til Ussia, konge i Juda.

³³Han var tjuefem år gammal då han vart konge, og han styrte i Jerusalem i seksten år. Mor hans heitte Jerusja og var dotter til Sadok.

³⁴Jotam gjorde det som rett var i HERRENS auge, i eitt og alt som Ussia, far hans, hadde gjort.

³⁵Men offerhaugane vart ikkje nedlagde. Folket heldt fram med å ofra og tenna offereld på haugane. Det var Jotam som bygde Øvreporten i HERRENS hus.

³⁶Det som elles er å seia om Jotam og alt han gjorde, står skrive i krønikeboka til Juda-kongane.

³⁷På den tid byrja HERREN å la aramearkongen Resin og Pekah, son til Remalja, gå mot Juda.

³⁸Så gjekk Jotam til kvile hos fedrane sine, og han vart gravlagd mellom dei i Davidsbyen. Ahas, son hans, vart konge etter han.