Read nynorsk 2011 2. Kongebok 21 Bible Online

2. Kongebok 21 - nynorsk 2011 bible

2. Kongebok 21

¹Manasse var tolv år gammal då han vart konge, og han styrte i Jerusalem i femtifem år. Mor hans heitte Hefsiba.

²Manasse gjorde det som vondt var i HERRENS auge, og tok etter alle avskyelege skikkar hos dei folkeslaga HERREN hadde drive bort for israelittane.

³Han bygde opp att offerhaugane som far hans, Hiskia, hadde øydelagt. Han reiste altaret for Baal og laga ein Asjera-påle, slik Ahab, kongen i Israel, hadde gjort. Og han tilbad og dyrka heile himmelhæren.

⁴Sjølv i HERRENS hus bygde han slike altar, endå HERREN hadde sagt: «I Jerusalem vil eg la namnet mitt bu.»

⁵I begge føregardane til tempelet bygde han altar for heile himmelhæren.

⁶[66] Manasse lét son sin gå gjennom elden. Han dreiv med teikntyding og spådomskunster og fekk seg åndemanarar og spåmenn. Han gjorde mykje som var vondt i HERRENS auge, og gjorde han rasande.

⁷Asjera-skulpturen som Manasse fekk laga, sette han i tempelet, sjølv om HERREN hadde sagt til David og Salomo, son hans: «I dette tempelet og i Jerusalem, som eg har valt ut mellom alle Israel-stammane, vil eg la namnet mitt bu til evig tid.

⁸Og eg vil aldri meir la Israel vandra heimlaus, langt bort frå landet eg gav fedrane deira, så sant dei legg vinn på å gjera alt det eg har sagt dei, og lever etter den lova som Moses, tenaren min, gav dei.»

⁹Men dei ville ikkje høyra, og Manasse førte dei vill, så dei gjorde endå meir vondt enn dei folkeslaga som HERREN hadde rydda ut for israelittane.

¹⁰Då tala HERREN gjennom tenarane sine, profetane, og sa:

¹¹Fordi Juda-kongen Manasse har gjort desse stygge gjerningane, har han i eitt og alt handla verre enn amorittane før han. Med si avgudsdyrking har han òg leidd judearane til synd.

¹²Difor seier HERREN, Israels Gud: No fører eg ulukke over Jerusalem og Juda så det skal ringja for øyra på kvar den som høyrer om det.

¹³Eg vil spenna ut same målesnora over Jerusalem som over Samaria og bruka same vektloddet som mot Ahabs hus. Eg vil tørka Jerusalem bort som når ein tørkar av eit fat og snur det opp ned.

¹⁴Eg forkastar den siste rest av folket mitt. Eg gjev dei over i hendene på fiendane deira, så dei alle kan røva og plyndra dei.

¹⁵Slik skal det gå fordi dei har gjort det som vondt er i mine auge. Dei har gjort meg rasande frå den dagen fedrane deira gjekk ut av Egypt, og til denne dag.

¹⁶Manasse lét så mange uskuldige døy at han fylte Jerusalem med blod frå ende til annan. Han fekk òg judearane med på si synd, og dei gjorde det som vondt var i HERRENS auge.

¹⁷Det som elles er å seia om Manasse og alt han utretta og den synda han gjorde, står skrive i krønikeboka til Juda-kongane.

¹⁸Manasse gjekk til kvile hos fedrane sine. Han vart gravlagd i Ussa-hagen, som låg like ved slottet hans, og Amon, son hans, vart konge etter han.

¹⁹Amon var tjueto år gammal då han vart konge, og han styrte i Jerusalem i to år. Mor hans heitte Mesjullemet og var dotter til Harus frå Jotba.

²⁰Amon gjorde det som vondt var i HERRENS auge, slik Manasse, far hans, hadde gjort.

²¹Han følgde i eitt og alt den same vegen som far sin. Han dyrka dei same avgudane som faren og bøygde seg og tilbad dei.

²²Han forlét HERREN, sine fedrars Gud, og vandra ikkje på HERRENS veg.

²³Mennene til Amon svor seg saman mot han, og dei drap kongen i hans eige hus.

²⁴Men folket i landet slo i hel alle som hadde svore seg saman mot kong Amon, og så tok dei Josjia, son hans, til konge etter han.

²⁵Det som elles er å seia om Amon og det han utretta, står skrive i krønikeboka til Juda-kongane.

²⁶Amon vart lagd i grava si i Ussa-hagen, og Josjia, son hans, vart konge etter han.