Read nynorsk 2011 2. Kongebok 22 Bible Online

2. Kongebok 22 - nynorsk 2011 bible

2. Kongebok 22

¹Josjia var åtte år gammal då han vart konge, og han styrte i Jerusalem i trettiein år. Mor hans heitte Jedida og var dotter til Adaja frå Boskat.

²Josjia gjorde det som rett var i HERRENS auge. Han følgde i eitt og alt den same vegen som David, stamfar hans, og bøygde ikkje av, korkje til høgre eller venstre.

³I det attande styringsåret sende kong Josjia riksskrivaren Sjafan, son til Asalja, son til Mesjullam, til HERRENS hus. Han sa:

⁴«Gå til øvstepresten Hilkia og bed han telja opp dei pengane som er komne inn til HERRENS hus, dei som dørvaktarane har samla inn hos folket.

⁵Han skal gje pengane til arbeidsleiarane som har tilsyn med HERRENS hus. Og dei skal gje dei vidare til handverkarane som arbeider i HERRENS hus og reparerer skadane der,

⁶og til tømrarane, bygningsmennene og murarane. Pengane skal òg brukast til å kjøpa inn tømmer og hoggen stein, så tempelet kan setjast i stand.

⁷Men ingen skal føra kontroll med dei pengane som er tiltrudde dei; for dei fer ærleg fram.»

⁸[67] Då sa øvstepresten Hilkia til riksskrivaren Sjafan: «Eg har funne ein bokrull med lova i HERRENS hus.» Hilkia gav bokrullen til Sjafan, som las han.

⁹Riksskrivaren Sjafan gjekk tilbake til kongen og melde: «Tenarane dine har tømt ut dei pengane som fanst i tempelet, og gjeve dei til arbeidsleiarane som har tilsyn med HERRENS hus.»

¹⁰Så fortalde han kongen at presten Hilkia hadde gjeve han ein bokrull. Og han las opp frå han for kongen.

¹¹Då Josjia høyrde det som stod i bokrullen, reiv han sund kleda sine.

¹²Så gav han dette bodet til presten Hilkia og til Ahikam, son til Sjafan, Akbor, son til Mika, riksskrivaren Sjafan og kongsmannen Asaja:

¹³«Gå og søk råd hos HERREN for meg og for folket og heile Juda om det som står i denne bokrullen som er funnen. For stor er HERRENS harme som har flamma opp mot oss fordi fedrane våre ikkje høyrde på det som står i denne bokrullen, og ikkje gjorde alt det som er oss føreskrive.»

¹⁴[68] Då gjekk presten Hilkia saman med Ahikam, Akbor, Sjafan og Asaja til profetkvinna Hulda, som var gift med Sjallum, son til Tikva, son til Harhas, han som hadde tilsyn med kleskammeret. Hulda budde i den nye bydelen i Jerusalem. Dei la saka fram for henne,

¹⁵og ho sa til dei: Så seier HERREN, Israels Gud: Sei til den mannen som har sendt dykk til meg:

¹⁶Så seier HERREN: Sjå, eg fører ulukke over denne staden og dei som bur der, alt det som er nemnt i den bokrullen Juda-kongen har lese.

¹⁷For dei har gått ifrå meg og tent offereld for andre gudar. Slik har dei gjort meg rasande med framferda si. Harmen flammar mot denne staden, og han skal ikkje slokna.

¹⁸Men til Juda-kongen som sende dykk for å søkja råd hos HERREN, skal de seia: Så seier HERREN, Israels Gud: Du har no høyrt desse orda.

¹⁹Dei rørte ved hjartet ditt, og du audmjuka deg for HERRENS andlet då du høyrde det eg tala mot denne staden og mot dei som bur der: at dei skal bli til skrekk og forbanning. Fordi du reiv sund kleda dine og gret for mitt andlet, har eg òg høyrt, seier HERREN.

²⁰Difor vil eg la deg koma til fedrane dine. I fred skal du sameinast med dei i grava. Auga dine skal sleppa å sjå all den ulukka eg fører over denne staden. Med dette svaret kom dei heim att til kongen.