Read nynorsk 2011 2. Kongebok 24 Bible Online

2. Kongebok 24 - nynorsk 2011 bible

2. Kongebok 24

¹I Jojakims dagar drog kong Nebukadnesar av Babel i krig, og Jojakim måtte gje seg under han i tre år. Men så gjorde Jojakim opprør mot han.

²Då sende HERREN røvarflokkar imot han, kaldearar, aramearar, moabittar og ammonittar. Han sende dei mot Juda for å gjera ende på folket. For så lydde ordet HERREN hadde tala gjennom tenarane sine, profetane.

³Det som hende med Juda, var heilt etter HERRENS ord. Slik ville han støyta dei bort frå sitt andlet på grunn av alle dei syndene Manasse hadde gjort.

⁴Han lét så mykje uskuldig blod renna at heile Jerusalem vart fylt med blod. Og det ville HERREN ikkje tilgje.

⁵Det som elles er å seia om Jojakim og alt det han gjorde, står skrive i krønikeboka til Juda-kongane.

⁶Jojakim gjekk til kvile hos fedrane sine, og son hans, Jojakin, vart konge etter han.

⁷[78] Kongen i Egypt drog no ikkje ut frå landet sitt meir, for kongen av Babel hadde teke alt land som høyrde han til, frå Egyptarbekken til elva Eufrat.

⁸Jojakin var atten år gammal då han vart konge, og han styrte i Jerusalem i tre månader. Mor hans heitte Nehusjta og var dotter til Elnatan frå Jerusalem.

⁹Jojakin gjorde det som vondt var i HERRENS auge, i eitt og alt slik far hans hadde gjort.

¹⁰[79] På den tid drog mennene til kong Nebukadnesar av Babel opp mot Jerusalem, og byen vart kringsett.

¹¹Nebukadnesar kom sjølv til byen medan mennene hans heldt han kringsett.

¹²Då gav Juda-kongen Jojakin seg over til kongen av Babel saman med mor si og tenarane sine, stormenn og hoffmenn. Og kongen av Babel tok han til fange i det åttande styringsåret sitt.

¹³Nebukadnesar førte bort alle skattane i HERRENS hus og i kongeborga og braut gullet av alt det utstyret som Israels konge Salomo hadde fått laga til HERRENS tempel. Det gjekk som HERREN hadde sagt.

¹⁴Han førte bort alt folket i Jerusalem, alle stormennene og rikmennene, ti tusen fangar i alt, og alle handverkarane og smedane. Berre dei fattigaste i landet vart att.

¹⁵Jojakin førte han i eksil til Babel. Mor til kongen og konene hans, hoffmennene og dei mektigaste mennene i landet vart òg bortførte frå Jerusalem til Babel.

¹⁶Rikmennene, sju tusen i talet, handverkarane og smedane, eitt tusen i talet, som alle var øvde krigarar, vart førte i eksil til Babel av kongen der.

¹⁷[80] Kongen av Babel gjorde Mattanja, onkel til Jojakim, til konge etter han og endra namnet hans til Sidkia.

¹⁸Sidkia var tjueein år gammal då han vart konge, og han styrte i Jerusalem i elleve år. Mor hans heitte Hamutal og var dotter til Jeremia frå Libna.

¹⁹Sidkia gjorde det som vondt var i HERRENS auge, i eitt og alt som Jojakim hadde gjort.

²⁰Fordi HERREN var vreid på Jerusalem og Juda, gjekk det som det gjorde, og til sist kasta han dei bort frå sitt andlet. Sidkia gjorde opprør mot kongen av Babel.