Read nynorsk 2011 1. Krønikebok 14 Bible Online

1. Krønikebok 14 - nynorsk 2011 bible

1. Krønikebok 14

¹Hiram, kongen i Tyros, sende nokre utsendingar til David. Dei kom med sedertre og hadde med seg steinhoggarar og tømrarar. Dei skulle byggja eit slott for han.

²Då skjøna David at HERREN hadde stadfest kongedømet hans over Israel, og at kongsveldet hadde vorte stort for hans folk Israels skuld.

³David tok seg fleire koner i Jerusalem, og han fekk endå fleire søner og døtrer.

⁴Dette er namna på dei sønene han fekk i Jerusalem: Sjammua, Sjobab, Natan, Salomo,

⁵Jibhar, Elisjua, Elpelet,

⁶Nogah, Nefeg, Jafia,

⁷Elisjama, Beeljada og Elifelet.

⁸Då filistrane høyrde at David var salva til konge over heile Israel, drog dei alle ut og ville få tak i han. Men David fekk greie på det og drog ut mot dei.

⁹Filistrane kom og plyndra i Refa'im-dalen.

¹⁰Då spurde David Gud til råds: «Skal eg dra ut mot filistrane? Vil du gje dei i mine hender?» Og HERREN svara: «Dra du; eg vil gje dei i dine hender.»

¹¹[45] Så drog dei opp til Baal-Perasim, og der slo David dei. Då sa han: «Gud har ved mi hand brote igjennom fiendens rekkjer, slik vatn bryt seg veg.» Difor kallar dei den staden Baal-Perasim.

¹²Der lét filistrane etter seg gudebileta sine, og David sa at dei skulle brennast.

¹³Men filistrane kom att og spreidde seg ut over dalen.

¹⁴[46] Då bad David Gud om råd igjen, og han svara: «Du skal ikkje følgja rett etter dei. Gå rundt dei, så du kjem på dei midt framfor baka-trea.

¹⁵Når du høyrer lyden av marsjgang over tretoppane, skal du gå til kamp. For då dreg Gud ut framfor deg for å slå filistarhæren.»

¹⁶David gjorde som Gud hadde sagt han. Dei slo filistarhæren og forfølgde han frå Gibeon til Geser.

¹⁷Davids namn vart kjent i alle land, og HERREN lét frykt for han koma over alle folkeslag.