Read nynorsk 2011 1. Krønikebok 16 Bible Online

1. Krønikebok 16 - nynorsk 2011 bible

1. Krønikebok 16

¹Dei førte Guds paktkiste inn og sette henne i det teltet som David hadde reist for henne, og dei bar fram brennoffer og fredsoffer for Gud.

²Då David var ferdig med å bera fram brennofferet og fredsofferet, velsigna han folket i HERRENS namn.

³Så delte han ut eit rundt brød, ei daddelkake og ei rosinkake til alle israelittane, til kvar mann og kvinne.

⁴Han sette nokre av levittane til å gjera teneste framfor HERRENS paktkiste, til å påkalla, takka og lovsyngja HERREN, Israels Gud.

⁵Asaf var den øvste av dei, etter han kom Sakarja, så Asiel, Sjemiramot, Jehiel, Mattitja, Eliab, Benaja, Obed-Edom og Je'iel, alle med harper og lyrer. Asaf skulle slå på symbalane,

⁶og prestane Benaja og Jahasiel skulle ha som fast oppgåve å blåsa i trompetar framfor paktkista.

⁷Den dagen sette David for første gong Asaf og brørne hans til å prisa HERREN:

⁸ Pris HERREN, kall på hans namn, gjer gjerningane hans kjende blant folka!

⁹Syng for han og spel for han, syng om alle hans under!

¹⁰Ver stolte over hans heilage namn! Gled dykk i hjartet, de som søkjer HERREN.

¹¹Spør etter HERREN og hans makt, søk alltid hans andlet!

¹²Kom i hug det underfulle han har gjort, teikna hans og lovene frå hans munn,

¹³du ætt av Israel, hans tenar, Jakobs søner, som han har valt ut.

¹⁴Han er HERREN vår Gud, lovene hans gjeld over heile jorda.

¹⁵Hugs hans pakt til evig tid, ordet han gav, i tusen slektsledd,

¹⁶ pakta han gjorde med Abraham, og eiden han svor til Isak.

¹⁷Dette sette han opp som forskrift for Jakob, som ei evig pakt for Israel.

¹⁸Han sa: «Eg gjev deg landet Kanaan til arv og eige.»

¹⁹ Der var de ein liten flokk, få og framande.

²⁰Dei vandra frå folk til folk, frå det eine riket til det andre.

²¹ Men han lét ingen få undertrykkja dei, han refsa kongar for deira skuld:

²² «Rør ikkje dei som eg har salva, gjer ikkje vondt mot mine profetar!»

²³ Syng for HERREN, all jorda! Forkynn hans frelse frå dag til dag!

²⁴Fortel mellom folkeslag om hans herlegdom, mellom alle folk om hans under!

²⁵ For HERREN er stor og verdig lov og pris, verd å frykta meir enn alle gudar.

²⁶Alle gudane til folka er avgudar. Det var HERREN som skapte himmelen.

²⁷Høgd og herlegdom er framfor han, makt og glans på hans heilage stad.

²⁸Gjev HERREN ære, de folk og slekter, gjev HERREN ære og makt!

²⁹Gjev HERREN den ære hans namn skal ha. Kom fram for han med gåver! Bøy dykk for HERREN i heilag prakt!

³⁰Skjelv for han, all jorda! Verda står fast, ho kan ikkje rokkast.

³¹ Himmelen skal gleda seg, jorda skal jubla. Dei skal forkynna mellom folka at HERREN er konge.

³²Havet og alt som fyller det, skal brusa. Marka skal jubla med alt ho ber.

³³Då ropar kvart tre i skogen av fryd for HERRENS andlet, for han kjem for å dømma jorda.

³⁴ Takk HERREN, for han er god, evig varer hans miskunn!

³⁵ De skal seia: Frels oss, Gud, vår frelsar. Sank oss inn og berg oss frå folka, så vi kan prisa ditt heilage namn og uredde lovsyngja deg.

³⁶Velsigna er HERREN, Israels Gud, frå æve til æve! Og heile folket sa «amen» og prisa HERREN.

³⁷David lét Asaf og songbrørne hans vera der framfor HERRENS paktkiste. Dei skulle ha som fast oppgåve å gjera teneste framfor kista, som det var fastsett for kvar dag,

³⁸og like eins Obed-Edom og brørne hans, sekstiåtte i alt. Obed-Edom, son til Jedutun, og Hosa skulle vera dørvaktarar.

³⁹Men presten Sadok og prestebrørne hans lét han vera ved HERRENS bustad på offerhøgda i Gibeon.

⁴⁰Dei skulle ha som fast oppgåve å bera fram brennoffer for HERREN på brennofferaltaret, både morgon og kveld, og gjera alt det som står skrive i den lova som HERREN hadde gjeve Israel.

⁴¹Saman med dei skulle Heman og Jedutun og dei andre utvalde som er nemnde med namn, prisa HERREN og seia: «Evig varer hans miskunn!»

⁴²Hos Heman og Jedutun var det trompetar og symbalar til å spela på og andre instrument til songen i gudstenesta. Jedutun-sønene var dørvaktarar.

⁴³Så gjekk heile folket heim att, kvar til sitt, og David vende heim for å velsigna sitt hus.