Read nynorsk 2011 1. Krønikebok 24 Bible Online

1. Krønikebok 24 - nynorsk 2011 bible

1. Krønikebok 24

¹Aronittane òg vart inndelte i skift. Sønene til Aron var Nadab og Abihu, Elasar og Itamar.

²Men Nadab og Abihu døydde før far sin, og dei hadde ingen søner. Difor vart berre Elasar og Itamar prestar.

³Saman med Sadok av Elasar-sønene og Ahimelek av Itamar-sønene delte David dei inn i grupper etter den tenesta dei skulle ha.

⁴Då det viste seg at Elasar-sønene hadde fleire leiarar enn Itamar-sønene, delte dei inn slik at Elasar-sønene fekk seksten leiarar for sine familiar og Itamar-sønene åtte for sine familiar.

⁵Begge vart inndelte ved loddkasting. For det fanst leiarar for heilagdomen, leiarar for Gud, både mellom Elasar-sønene og Itamar-sønene.

⁶Skrivaren Sjemaja, son til Netanel, ein av levittane, skreiv dei opp i nærvær av kongen og stormennene, presten Sadok og Ahimelek, son til Ebjatar, og leiarane for familiane til prestane og levittane. Ein familie frå Elasar-slekta og ein familie frå Itamar-slekta vart tekne ut skiftevis.

⁷Det første loddet fall på Jojarib, det andre på Jedaja,

⁸det tredje på Harim, det fjerde på Seorim,

⁹det femte på Malkia, det sjette på Mijamin,

¹⁰det sjuande på Hakkos, det åttande på Abia,

¹¹det niande på Jesjua, det tiande på Sjekanja,

¹²det ellevte på Eljasjib, det tolvte på Jakim,

¹³det trettande på Huppa, det fjortande på Jesjebab,

¹⁴det femtande på Bilga, det sekstande på Immer,

¹⁵det syttande på Hesir, det attande på Happisses,

¹⁶det nittande på Petahja, det tjuande på Jeheskel,

¹⁷det tjueførste på Jakin, det tjueandre på Gamul,

¹⁸det tjuetredje på Delaja og det tjuefjerde på Maasja.

¹⁹Dette var dei gruppene dei skulle vera inndelte i når dei kom og gjorde teneste i HERRENS hus etter den ordninga dei hadde fått frå Aron, stamfar sin, slik HERREN, Israels Gud, gav han påbod om.

²⁰Dei andre levittane var: av Amram-sønene Sjubael, av Sjubael-sønene Jehdeja;

²¹av Rehabja, det vil seia Rehabja-sønene, Jisjia, som var leiar;

²²av Jishar-sønene Sjelomot, av Sjelomot-sønene Jahat;

²³[70] av Hebron-sønene Jeria, den andre var Amarja, den tredje Jahasiel og den fjerde Jekamam;

²⁴av Ussiel-sønene Mika, av Mika-sønene Sjamir

²⁵— bror til Mika var Jisjia; av Jisjia-sønene Sakarja;

²⁶av Merari-sønene Mahli og Musji — mellom sønene hans var Jaasia òg,

²⁷og etterkomarar av Merari gjennom Jaasia, son hans, var Sjoham, Sakkur og Ibri;

²⁸Elasar, son til Mahli, hadde ingen søner.

²⁹Til Kisj, det vil seia sønene til Kisj, høyrde Jerahmeel.

³⁰Sønene til Musji var Mahli, Eder og Jerimot. Dette var Levi-sønene, familie for familie.

³¹Dei kasta òg lodd, som aronittane, brørne sine, i nærvær av kong David, Sadok og Ahimelek og leiarane for familiane til prestane og levittane, med same vilkår for dei fremste familiane som for dei ringaste.