Read nynorsk 2011 2. Krønikebok 1 Bible Online

2. Krønikebok 1 - nynorsk 2011 bible

2. Krønikebok 1

¹Salomo, son til David, styrkte kongsmakta si. HERREN hans Gud var med han og gjorde han stor og mektig.

²Salomo tala til heile Israel — til førarane for tusen mann og hundre mann, til dommarane og til alle leiarane i Israel, leiarane for familiane.

³Så drog Salomo og heile forsamlinga med han til offerhaugen i Gibeon. For der stod Guds teltheilagdom, som Moses, HERRENS tenar, hadde laga i ørkenen.

⁴Men Guds paktkiste hadde David ført opp frå Kirjat-Jearim til den staden han hadde stelt til for henne. For David hadde reist eit telt for henne i Jerusalem.

⁵Bronsealtaret som Besalel, son til Uri, son til Hur, hadde laga, stod i Gibeon framfor HERRENS bustad. Dit søkte Salomo og forsamlinga.

⁶Og der, på bronsealtaret som høyrde teltheilagdomen til, ofra Salomo til HERREN; tusen brennoffer bar han fram på det.

⁷Same natta synte Gud seg for Salomo og sa til han: «Bed om kva du vil. Eg skal gje deg det!»

⁸Salomo svara Gud: «Du har vist stor miskunn mot David, far min, og gjort meg til konge etter han.

⁹HERRE, min Gud, lat no ordet ditt til David, far min, bli stadfest! Du har gjort meg til konge over eit folk like talrikt som støvet på jorda.

¹⁰Gjev meg no visdom og vit så eg kan vera førar og leiar for dette folket. For kven kunne elles styra dette folket ditt, så stort som det er?»

¹¹Då sa Gud til Salomo: «Sidan det var dette som låg deg på hjartet, og du ikkje bad om rikdom, gods og ære, ikkje om død over fiendane dine eller om eit langt liv, men bad om visdom og forstand så du kan styra folket mitt som eg har sett deg til konge over,

¹²så skal du få visdom og vit. Men eg vil òg gje deg så mykje rikdom, formue og ære som ingen av kongane før deg har hatt og ingen etter deg kjem til å få.»

¹³Så fór Salomo frå offerhaugen i Gibeon, bort frå teltheilagdomen og heim til Jerusalem. Og han styrte som konge i Israel.

¹⁴Salomo samla vogner og hestar. Han hadde fjorten hundre vogner og tolv tusen hestar. Han plasserte dei i vognbyane og hos seg sjølv i Jerusalem.

¹⁵Kongen gjorde sølv og gull like vanleg i Jerusalem som stein, og sedertre like vanleg som morbærtre i låglandet.

¹⁶[1] Hestane sine fekk Salomo frå Egypt og frå Kue. Kjøpmennene hans henta dei i Kue mot betaling.

¹⁷[2] Kvar vogn som vart ført inn frå Egypt, kosta seks hundre sjekel sølv, og kvar hest eitt hundre og femti sjekel. Så selde dei hestar og vogner vidare til hetittkongane og aramearkongane.