Read nynorsk 2011 2. Krønikebok 11 Bible Online

2. Krønikebok 11 - nynorsk 2011 bible

2. Krønikebok 11

¹Så snart Rehabeam var komen til Jerusalem, samla han Judas og Benjamins hus, hundre og åtti tusen utvalde krigarar. Dei skulle strida mot Israel og vinna kongsmakta tilbake for Rehabeam.

²Då kom HERRENS ord til gudsmannen Sjemaja:

³«Sei til Juda-kongen Rehabeam, son til Salomo, og til alle israelittane i Juda og Benjamin:

⁴Så seier HERREN: De skal ikkje fara opp og strida mot brørne dykkar. Far heim att, kvar til sitt hus! For det som har hendt, er kome frå meg.» Då lydde dei HERRENS ord; dei snudde og gjekk ikkje mot Jeroboam.

⁵Rehabeam vart buande i Jerusalem, og han bygde ut nokre byar i Juda til festningsbyar.

⁶Såleis bygde han Betlehem, Etam og Tekoa,

⁷Bet-Sur, Soko og Adullam,

⁸Gat, Maresja og Sif,

⁹Adorajim, Lakisj og Aseka,

¹⁰Sora, Ajjalon og Hebron. Desse festningsbyane låg i Juda og Benjamin.

¹¹Han gjorde festningane sterke, sette inn kommandantar og gav dei lager med mat, olje og vin.

¹²Kvar einskild by utstyrte han med skjold og spyd. Slik gjorde han dei svært sterke. Juda og Benjamin høyrde han til.

¹³Prestane og levittane i heile Israel kom frå alle kantar av landet og steig fram for Rehabeam.

¹⁴Levittane forlét beitemark og eigedom og drog til Juda og Jerusalem fordi Jeroboam og sønene hans hindra dei i å gjera presteteneste for HERREN.

¹⁵[35] Han sette inn andre prestar på offerhaugane, for bukkane og kalvane som han hadde laga.

¹⁶Med prestane og levittane følgde alle dei som hadde lagt seg på hjartet å søkja Israels Gud. Frå alle Israel-stammane kom dei til Jerusalem for å ofra til HERREN, sine fedrars Gud.

¹⁷Dei styrkte kongedømet i Juda og sikra makta for Rehabeam, son til Salomo, i tre år. For i tre år følgde dei vegane til David og Salomo.

¹⁸Rehabeam tok Mahalat til kone. Ho var dotter til Jerimot, son til David, og Abihajil, dotter til Eliab, son til Isai.

¹⁹Ho fødde han sønene Je'usj, Sjemarja og Saham.

²⁰Sidan tok han Maaka, dotter til Absalom, til kone. Ho fødde han Abia, Attai, Sisa og Sjelomit.

²¹Rehabeam heldt meir av Maaka, dotter til Absalom, enn av alle dei andre konene og følgjekonene sine. I alt hadde han atten koner og seksti følgjekoner. Og han fekk tjueåtte søner og seksti døtrer.

²²Rehabeam sette Abia, son til Maaka, til overhovud og leiar mellom brørne, for han tenkte å gjera han til konge.

²³Men han var klok nok til å spreia sønene sine over heile Juda og Benjamin, i alle festningsbyane der. Han gav dei rikeleg med mat og skaffa dei mange koner.