Read nynorsk 2011 2. Krønikebok 14 Bible Online

2. Krønikebok 14 - nynorsk 2011 bible

2. Krønikebok 14

¹Så gjekk Abia til kvile hos fedrane sine. Dei gravla han i Davidsbyen, og son hans, Asa, vart konge etter han. I hans dagar hadde landet ro i ti år.

²Asa gjorde det som godt og rett var i auga til HERREN hans Gud.

³Han fjerna altara for framande gudar og offerhaugane, slo sund steinstøttene og hogg ned Asjera-pålane.

⁴Han sa til judearane at dei skulle søkja HERREN, sine fedrars Gud, og halda lova og boda.

⁵Frå alle byane i Juda fjerna han offerhaugane og røykjelsesaltara. Og kongeriket hadde ro under han.

⁶Asa bygde festningsbyar i Juda, for landet hadde ro. Ingen gjekk til krig mot han i desse åra, for HERREN gav han fred.

⁷Asa sa til judearane: «Lat oss byggja ut desse byane og reisa murar rundt dei, med tårn og portar og bommar, medan landet enno ligg fritt framfor oss. For vi har søkt HERREN vår Gud. Vi søkte han, og han gav oss fred på alle kantar.» Så tok dei til å byggja, og alt gjekk godt.

⁸Asa hadde ein hær på tre hundre tusen mann frå Juda, væpna med store skjold og spyd, og to hundre og åtti tusen mann frå Benjamin, som bar små skjold og skaut med boge. Alle var dei djerve krigarar.

⁹[37] Ein gong drog kusjitten Serah ut mot judearane med ein hær på tusen gonger tusen mann og tre hundre stridsvogner. Då han var komen så langt som til Maresja,

¹⁰drog Asa ut mot han. Dei stilte seg opp til kamp i Sefata-dalen nær Maresja.

¹¹Då ropa Asa til HERREN sin Gud og sa: «HERRE, berre du kan hjelpa i kampen mellom den som er sterk og den som er svak. Hjelp oss, HERRE, vår Gud! For vi set vår lit til deg, og i ditt namn har vi gått mot denne veldige styrken. HERRE, du er vår Gud. Ikkje noko menneske kan stå seg mot deg!»

¹²Då lét HERREN kusjittane lida nederlag for Asa og judearane, og kusjittane rømde.

¹³Asa og folket som var med han, forfølgde dei heilt til Gerar, og kusjittane fall til siste mann. Dei vart knuste av HERREN og hans hær, og judearane tok eit overlag stort bytte.

¹⁴Dei tok alle byane kring Gerar, for ei redsle for HERREN var komen over folket der. Dei plyndra alle desse byane, for der var det mykje å plyndra.

¹⁵Dei gjekk òg til åtak på gjetartelta og førte bort ei mengd med sauer og kamelar. Så drog dei tilbake til Jerusalem.