Read nynorsk 2011 2. Krønikebok 17 Bible Online

2. Krønikebok 17 - nynorsk 2011 bible

2. Krønikebok 17

¹Etter Asa vart Josjafat, son hans, konge. Han styrkte stillinga mot Israel.

²Han la troppar i alle festningsbyane i Juda, og han sette vaktpostar rundt om i Juda og i dei byane som Asa, far hans, hadde teke i Efraim.

³HERREN var med Josjafat, for han følgde dei vegane som David, stamfar hans, før hadde følgt. Han søkte ikkje Baal-gudane,

⁴men Gud til far sin. Han heldt boda hans og levde ikkje slik som dei gjorde i Israel.

⁵Difor tryggja HERREN kongsmakta i hans hand, og heile Juda kom med gåver til Josjafat, så han fekk stor rikdom og ære.

⁶Med frimodig hjarte følgde han HERRENS vegar, og han fjerna òg offerhaugane og Asjera-pålane frå Juda.

⁷I det tredje styringsåret sitt sende Josjafat nokre av stormennene sine ut for å undervisa folket i Juda-byane. Det var Ben-Hajil, Obadja, Sakarja, Netanel og Mikaja.

⁸Saman med dei sende han levittane Sjemaja, Netanja, Sebadja, Asael, Sjemiramot, Jonatan, Adonja, Tobia og Tob-Adonja, levittar alle saman, dessutan prestane Elisjama og Joram.

⁹[38] Når dei underviste i Juda, hadde dei HERRENS lovbok med seg. Dei drog omkring i alle Juda-byane og underviste folket.

¹⁰Ei redsle for HERREN var komen over alle land og rike som låg kring Juda, så dei ikkje gjekk til krig mot Josjafat.

¹¹Nokre av filistrane kom til Josjafat med gåver og med sølv som avgift. Arabarane òg kom til han med småfe, sju tusen sju hundre vêrar og sju tusen sju hundre bukkar.

¹²Slik fekk Josjafat større og større makt, og han bygde borger og forrådsbyar i Juda.

¹³Han hadde store arbeid i gang i Juda-byane og stridsmenn, djerve krigarar, i Jerusalem.

¹⁴Slik var dei mønstra, slekt for slekt: Førarane for tusen i Juda var: Adna, som var førar for 300 000 djerve krigarar;

¹⁵jamsides han Johanan, som var førar for 280 000;

¹⁶og jamsides han Amasja, son til Sikri, som frivillig hadde gått i HERRENS teneste, og saman med han 200 000 djerve krigarar.

¹⁷Frå Benjamin var det Eljada, ein djerv krigar, og saman med han 200 000 mann som var væpna med boge og skjold,

¹⁸og jamsides han Josabad med 180 000 våpenføre menn.

¹⁹Dette var dei som stod i teneste hos kongen, forutan dei som kongen hadde lagt i festningsbyane i heile Juda.