Read nynorsk 2011 2. Krønikebok 20 Bible Online

2. Krønikebok 20 - nynorsk 2011 bible

2. Krønikebok 20

¹Ei tid etter hende det at moabittane og ammonittane og saman med dei ein del me'unittar gjekk til krig mot Josjafat.

²[41] Det kom nokon og sa til Josjafat: «Det kjem ein stor styrke mot deg frå den andre sida av sjøen, frå Edom. Dei er alt i Haseson-Tamar» — det er En-Gedi.

³Då vart Josjafat redd, og han vende seg til HERREN for å spørja han til råds. Så ropa han ut ei faste over heile Juda.

⁴Judearane samla seg og ville spørja HERREN til råds. Frå alle Juda-byane kom dei for å be HERREN om råd.

⁵Josjafat steig fram i forsamlinga av folk frå Juda og Jerusalem, i HERRENS hus, framfor den nye føregarden,

⁶og sa: HERRE, våre fedrars Gud! Det er du som er Gud i himmelen, og som rår over alle kongerika til folkeslaga! I di hand er makt og velde, og ingen kan stå seg mot deg.

⁷ Du, vår Gud, dreiv ut dei som budde i dette landet for Israel, folket ditt, og du gav ætta til Abraham, venen din, landet for alltid.

⁸Der busette dei seg, og der bygde dei ein heilagdom for namnet ditt og sa:

⁹ «Om noko vondt kjem over oss, sverd, straff, pest eller svolt, då vil vi gå fram for dette huset, for ditt andlet; for i dette huset bur namnet ditt. Vi vil ropa til deg i vår naud, og du vil høyra og frelsa.»

¹⁰ Sjå no på ammonittane, moabittane og folket frå fjellandet Se'ir! Du lét ikkje israelittane trengja inn mellom dei den gongen dei kom frå Egypt; dei bøygde av og utrydda dei ikkje.

¹¹Men sjå korleis dei løner oss! No kjem dei og vil driva oss bort frå din eigedom, den du gav oss til eige.

¹² Vår Gud, du skal dømma dei. For vi er maktlause mot denne store styrken som kjem mot oss. Vi veit ikkje kva vi skal gjera; men auga våre er vende mot deg.

¹³Alle judearane stod der for HERRENS andlet med familiane sine, kvinnene og borna.

¹⁴Midt i forsamlinga kom HERRENS ande over levitten Jahasiel, son til Sakarja, son til Benaja, son til Je'iel, son til Mattanja, som var av Asaf-slekta.

¹⁵Han sa: «Lyd etter, alle judearar og de som bur i Jerusalem, og du, kong Josjafat! Så seier HERREN til dykk: Ver ikkje redde og mist ikkje motet av denne store styrken; for dette er ikkje dykkar strid, men Guds.

¹⁶Far ned mot dei i morgon når dei er på veg oppover Sis-bakken. De kjem til å møta dei ved enden av kløfta ut mot Jeruel-ørkenen.

¹⁷Men det er ikkje de som skal strida denne gongen. De skal berre stilla dykk opp og bli ståande, så skal de sjå korleis HERREN frelser dykk, Juda og Jerusalem. Ver ikkje redde og mist ikkje motet! Dra ut mot dei i morgon! HERREN skal vera med dykk.»

¹⁸Då bøygde Josjafat seg med andletet mot jorda, og heile Juda og alle som budde i Jerusalem, fall ned for HERREN og tilbad han.

¹⁹Dei levittane som høyrde Kehat- og Korah-sønene til, reiste seg og lova HERREN, Israels Gud, med høg og kraftig røyst.

²⁰Tidleg neste morgon braut dei opp og drog ut til Tekoa-ørkenen. Med det same dei drog ut, steig Josjafat fram og sa: «Høyr på meg, de judearar og de som bur i Jerusalem! Ver tru mot HERREN dykkar Gud, så skal de stå støtt! Ver tru mot profetane hans, så skal de ha lukka med dykk!»

²¹Då han hadde samrådd seg med folket, valde han ut songarar som skulle lovsyngja HERREN i heilag prakt. Dei drog ut i spissen for krigarane medan dei song: «Pris HERREN, evig varer hans miskunn!»

²²Så snart dei sette i med jubelrop og lovsong, lét HERREN ammonittane, moabittane og folket frå Se'ir-fjella, dei som rykte fram mot Juda, falla i bakhald. Slik vart dei slegne.

²³Då vende ammonittane og moabittane seg mot folket frå Se'ir-fjella for å slå dei med bann og utrydda dei. Og då dei hadde gjort ende på folket frå Se'ir, gav dei seg til å utrydda kvarandre.

²⁴Då judearane kom fram til utsiktspunktet over ørkenen og såg seg om etter hærstyrken, fekk dei auge på dei falne som låg døde på jorda. Ingen hadde sloppe unna.

²⁵Josjafat og folket hans drog då dit og ville ta bytte, og dei fann ei mengd med dyr, gods, klede og kostbare ting. Dei tok meir enn dei kunne bera. Tre dagar varte plyndringa, så stort var byttet.

²⁶[42] Fjerde dagen samla dei seg i Beraka-dalen, for der velsigna dei HERREN. Difor kalla dei denne staden Beraka-dalen, og det heiter han den dag i dag.

²⁷Så vende dei attende, mennene frå Juda og Jerusalem, med Josjafat i spissen, og glade kom dei tilbake til Jerusalem, for HERREN hadde gjeve dei grunn til å gleda seg over fiendane.

²⁸Med harper, lyrer og trompetar drog dei inn i Jerusalem, til HERRENS hus.

²⁹Det kom redsle for Gud over alle land og rike då dei høyrde at HERREN hadde kjempa mot Israels fiendar.

³⁰No var det ro i Josjafats rike; for hans Gud lét han få fred på alle kantar.

³¹Såleis rådde Josjafat i Juda. Han var trettifem år gammal då han vart konge, og han styrte i Jerusalem i tjuefem år. Mor hans heitte Asuba og var dotter til Sjilhi.

³²Josjafat følgde den same vegen som Asa, far sin, og veik ikkje av frå den, men gjorde det som rett var i HERRENS auge.

³³Men offerhaugane vart ikkje nedlagde, og folket hadde endå ikkje vendt hjartet til sine fedrars Gud.

³⁴Det som elles er å seia om Josjafat, frå først til sist, det står skrive i krønikeboka til Jehu, son til Hanani. Ho er teken med i boka om Israels-kongane.

³⁵Sidan allierte Josjafat, Juda-kongen, seg med Ahasja, Israels-kongen, han som var skuld i så mykje urett.

³⁶[43] Han gjekk saman med han om å byggja skip som skulle gå til Tarsis. Dei bygde skipa i Esjon-Geber.

³⁷Då profeterte Elieser, son til Dodava frå Maresja, mot Josjafat og sa: «Fordi du har alliert deg med Ahasja, skal HERREN øydeleggja verket ditt.» Skipa forliste, så dei kunne ikkje segla til Tarsis.