Read nynorsk 2011 2. Krønikebok 31 Bible Online

2. Krønikebok 31 - nynorsk 2011 bible

2. Krønikebok 31

¹Då dei var ferdige med alt dette, drog alle dei israelittane som var der, av stad til byane i Juda. Dei slo sund steinstøttene, hogg ned Asjera-pålane og reiv ned offerhaugane og altara i heile Juda og Benjamin, i Efraim og Manasse, til det ikkje var noko att av dei. Så vende alle israelittane heim att til byane sine, kvar til sin eigedom.

²[65] Hiskia fastsette på nytt skiftordninga for prestane og levittane. Kvar prest og levitt fekk si særskilde teneste. Dei skulle bera fram brennoffer og fredsoffer, gjera teneste og syngja takke- og lovsongar ved portane til HERRENS leir.

³Kongen gav ein del av det han eigde, til brennoffera som skulle berast fram morgon og kveld, på sabbatane, nymånedagane og høgtidene, som skrive står i HERRENS lov.

⁴Han sa òg at folket som budde i Jerusalem, skulle gje prestane og levittane den delen dei skulle ha, så dei kunne halda fast ved HERRENS lov.

⁵Då dette påbodet vart kjent, kom israelittane med førstegrøde i stor mengd, av korn og ny vin, fin olje og honning og av alt det dei elles dyrka på marka. Dei kom òg med rikeleg tiend av alt.

⁶Dei israelittane og judearane som budde i Juda-byane, gav òg tiend av storfe og småfe, og dei kom med heilage gåver som var vigsla til HERREN deira Gud. Dei bar dei fram og la dei i haug etter haug.

⁷I den tredje månaden tok dei til å leggja opp haugane, og i den sjuande månaden var dei ferdige.

⁸Då Hiskia og stormennene kom og fekk sjå haugane, velsigna dei HERREN og Israel, folket hans.

⁹Hiskia spurde seg for hos prestane og levittane om desse haugane.

¹⁰Øvstepresten Asarja, som var av Sadoks hus, svara han: «Heilt frå det tok til å koma offergåver til HERRENS hus, har vi ete oss mette og endå hatt rikeleg til overs. For HERREN har velsigna folket sitt. Difor har vi alt dette att.»

¹¹Då sa Hiskia at dei skulle gjera i stand rom i HERRENS hus, og dei så gjorde.

¹²Folket kom då trufast med offergåvene, tienda og dei heilage gåvene. Levitten Konanja hadde hovudansvaret for gåvene, og Sjimi, bror hans, var nest etter han.

¹³Under Konanja og Sjimi, bror hans, stod andre tilsynsmenn: Jehiel, Asasja, Nahat, Asael, Jerimot, Josabad, Eliel, Jismakja, Mahat og Benaja. Dei var utpeika av kong Hiskia og Asarja, som hadde hovudansvaret for Guds hus.

¹⁴Kore, son til levitten Jimna, som heldt vakt ved Austporten, hadde ansvaret for dei frivillige gåvene til Gud. Han skulle dela ut HERRENS offergåver og dei høgheilage gåvene.

¹⁵Under han stod Eden, Minjamin, Jesjua, Sjemaja, Amarja og Sjekanja, som hjelpte han trufast i alle prestebyane. Dei skulle dela ut gåvene til brørne sine, både store og små, i skift for skift,

¹⁶til alle menn og gutar som var tre år eller meir, anten dei var oppskrivne i slektsregistra eller ikkje, alle som dag etter dag kom til HERRENS hus og gjorde tenesta si og tok vaktene sine, skift for skift.

¹⁷Prestane var oppskrivne i slektsregisteret etter familiane sine, og levittane som var tjue år eller meir, etter vaktene sine, skift for skift.

¹⁸Alle var oppskrivne med heile familien sin, med koner, søner og døtrer, for dei skulle helga seg med truskap.

¹⁹For dei av Aron-sønene, prestane, som budde på markene kring byane sine, var det i kvar by utpeika nokre menn, nemnde med namn, som skulle dela ut det som fall på alle menn og gutar av presteslekt og på alle som var oppskrivne i registeret over levittane.

²⁰Såleis gjorde Hiskia i heile Juda; han gjorde det som var godt, rett og sant for HERREN sin Gud.

²¹I alt han tok seg føre, anten det gjaldt tenesta i Guds hus eller lova og boda, søkte han Gud av heile sitt hjarte, og det lukkast for han.