Read nynorsk 2011 2. Krønikebok 4 Bible Online

2. Krønikebok 4 - nynorsk 2011 bible

2. Krønikebok 4

¹[13] Salomo laga eit bronsealtar. Det var tjue alner langt, tjue alner breitt og ti alner høgt.

²[14] Så laga han havet av støypt metall. Det var sirkelforma og målte ti alner frå kant til kant. Høgda var fem alner, og omkrinsen var tretti alner målt med målesnor.

³Nedanfor kanten var det bilete av oksar heile vegen rundt. Dei omkransa heile havet, ti på kvar alen. Det var to rader med oksar, støypte i eitt med havet.

⁴Havet stod på tolv oksar. Tre snudde mot nord, tre mot vest, tre mot sør og tre mot aust, og dei stod alle med bakkroppen innover. Havet kvilte på dei.

⁵[15] Det var ei handsbreidd tjukt, og kanten var laga som kanten på eit beger, forma som ei lilje. Det tok tre tusen bat.

⁶Så laga han ti fat og sette fem på høgre og fem på venstre sida. Dei skulle nyttast til vasking. Det som høyrde brennoffera til, vart skylt i dei. Men prestane skulle vaska seg i havet.

⁷Han laga òg ti lysestakar av gull etter forskriftene for dei og sette dei i tempelet, fem på høgre og fem på venstre sida.

⁸Han laga ti bord som han stilte opp i tempelet, fem på høgre og fem på venstre sida. Han laga òg hundre offerskåler av gull.

⁹Så bygde han føregarden for prestar og den store føregarden med dører til. Dørene kledde han med bronse.

¹⁰Havet sette han på høgre sida, mot søraust.

¹¹Hiram laga grytene, eldskuffene og offerskålene. Med dette hadde Hiram fullført det handverksarbeidet han skulle gjera for kong Salomo i Guds hus:

¹²to søyler; to skåler på søylehovuda øvst på søylene; to slyngornament til å dekkja dei to skålene;

¹³dei fire hundre granatepla til dei to slyngornamenta — to rader med granateple til kvart ornament, til å dekkja dei to skålene på søylehovuda øvst på søylene.

¹⁴Han laga vognstativa og fata til kvart av dei,

¹⁵havet — det var berre eitt — og dei tolv oksane under det,

¹⁶grytene, eldskuffene og gaflane. Alt dette utstyret som meisteren Hiram laga for kong Salomo til HERRENS hus, var av polert bronse.

¹⁷Det var på Jordan-sletta kongen fekk dei støypte, i den tjukke leirjorda mellom Sukkot og Sereda.

¹⁸Salomo laga alt dette utstyret i slike mengder at det ikkje lét seg seia kor mykje bronsen vog.

¹⁹Salomo fekk òg laga alt det andre som skulle vera i Guds hus: gullaltaret og borda som skodebrøda skulle liggja på,

²⁰lysestakane med lamper som skulle kveikjast etter forskriftene — dei stod framfor Det høgheilage og var av reint gull —

²¹blomeornamenta, lampene og tengene av gull, ja, av det finaste gull,

²²lysesaksene, offerskålene, kannene og glopannene av reint gull. Inngangsdørene til tempelet, både dei indre dørene til Det høgheilage og dørene inn til sjølve tempelet, var av gull.