Read nynorsk 2011 Nehemja 1 Bible Online

Nehemja 1 - nynorsk 2011 bible

Nehemja 1

¹[1] Ord av Nehemja, son til Hakalja. Det var i månaden kislev i det tjuande året, medan eg var i borga Susa.

²Då kom Hanani, ein av brørne mine, og nokre menn frå Juda. Eg spurde dei ut om dei judearane som hadde sloppe unna fangenskapet, og om Jerusalem.

³Dei svara: «Dei som har sloppe unna fangenskapet der i provinsen, er i stor ulukke og vanære. Muren kring Jerusalem er nedbroten, og portane er brende.»

⁴Då eg høyrde dette, sette eg meg ned og gret. Eg sørgde i fleire dagar. Eg fasta og bad til himmelens Gud.

⁵Eg sa: Å, HERRE, himmelens Gud, du store og skremmande Gud, som held pakta og viser kjærleik mot alle som elskar deg og held dine bod!

⁶Lat øyret ditt lytta og auga dine vera opne så du høyrer din tenars bøn som eg bed til deg no, både dag og natt, for israelittane, dine tenarar. Eg sannar syndene som vi israelittar har gjort mot deg. Eg og farshuset mitt har òg synda.

⁷Vi har handla ille mot deg og ikkje halde dei bod, forskrifter og lover som du gav Moses, tenaren din.

⁸Hugs det du påla Moses, tenaren din: «Er de trulause, vil eg spreia dykk mellom folka.

⁹Men vender de om til meg og held boda mine og lever etter dei, om de så er drivne bort der himmelen endar, skal eg samla dykk og føra dykk til den staden eg har valt til bustad for namnet mitt.»

¹⁰Dei er tenarane dine og folket ditt, som du har fria ut med di store kraft og sterke hand.

¹¹Å, HERRE, lat øyret ditt lytta til bønene frå tenaren din og frå tenarane dine som gjerne vil frykta ditt namn. Lat tenaren din lukkast i dag, lat han møta miskunn hos denne mannen! Eg var kongens munnskjenk då dette hende.