Read nynorsk 2011 2. Mosebok 1 Bible Online

2. Mosebok 1 - nynorsk 2011 bible

2. Mosebok 1

¹Dette er namna på Israels søner som kom til Egypt; dei kom saman med Jakob, kvar med sin huslyd:

²Ruben, Simon, Levi og Juda,

³Jissakar, Sebulon og Benjamin,

⁴Dan og Naftali, Gad og Asjer.

⁵Dei var i alt sytti personar, dei som stamma frå Jakob. Josef var alt i Egypt.

⁶Så døydde Josef og alle brørne hans og heile dette slektsleddet.

⁷Men israelittane var fruktbare, dei auka, vart mange og svært talrike. Landet vart fullt av dei.

⁸Det stod fram ein ny konge i Egypt, ein som ikkje visste om Josef.

⁹Han sa til folket sitt: «Sjå, Israelsfolket har vorte for stort og talrikt for oss.

¹⁰Kom, lat oss gå klokt til verks mot dei, så dei ikkje blir endå fleire! For blir det krig, slår dei seg kanskje saman med fiendane våre, strider mot oss og dreg frå landet.»

¹¹[1] Difor sette dei oppsynsmenn til å plaga israelittane med tvangsarbeid. Dei måtte byggja to forrådsbyar for farao, Pitom og Ramses.

¹²Men di meir dei vart plaga, di fleire vart dei, og di meir breidde dei seg utover. Og egyptarane vart redde israelittane.

¹³Dei tvinga israelittane til slavearbeid

¹⁴og gjorde livet bittert for dei. Dei påla dei hardt arbeid med leire og teglstein og allslags arbeid ute på marka. Alt dette slavearbeidet vart israelittane tvinga til å gjera.

¹⁵Kongen i Egypt sa til jordmødrene åt hebrearane — den eine heitte Sjifra og den andre Pua:

¹⁶«Når de hjelper hebrearkvinnene til å føda, skal de sjå etter i fødestolen. Er det ein gut, skal de drepa han; er det ei jente, skal ho få leva.»

¹⁷Men jordmødrene frykta Gud og gjorde ikkje som egyptarkongen hadde sagt dei. Dei lét gutane leva.

¹⁸Då kalla egyptarkongen jordmødrene til seg og sa: «Kvifor gjer de dette? De lèt gutane leva!»

¹⁹Jordmødrene svara farao: «Hebrearkvinnene er ikkje som dei egyptiske. Dei er meir livskraftige. Før jordmora kjem til dei, har dei fødd.»

²⁰Då gjorde Gud vel imot jordmødrene, og folket vart stort og overlag talrikt.

²¹Og fordi jordmødrene frykta Gud, gav han dei etterkomarar.

²²Då gav farao heile folket sitt dette påbodet: «Kvar nyfødd gut skal de kasta i Nilen, men døtrene skal de la leva!»