Read nynorsk 2011 2. Mosebok 14 Bible Online

2. Mosebok 14 - nynorsk 2011 bible

2. Mosebok 14

¹ HERREN sa til Moses:

²«Sei til israelittane at dei skal snu om og slå leir framfor Pi-Hahirot, mellom Migdol og havet! Framfor Baal-Safon, midt imot byen, skal de slå leir ved havet.

³Så kjem farao til å seia at israelittane har gått seg vill i landet, og at ørkenen har stengt dei inne.

⁴Eg vil gjera hjartet til farao ubøyeleg, så han set etter dei. Då skal eg visa min herlegdom på farao og heile hans hær. Og egyptarane skal kjenna at eg er HERREN.» Dette gjorde israelittane.

⁵Då kongen i Egypt fekk melding om at folket hadde rømt, kom han og tenarane hans på andre tankar om folket. «Kva er det vi har gjort?» sa dei. «Vi lét israelittane dra frå slavearbeidet hos oss!»

⁶Så lét han spenna for vogna si og tok hæren med seg.

⁷Han tok 600 av dei beste vognene og elles alt som fanst av vogner i Egypt, og offiserar til kvar av dei.

⁸For HERREN gjorde farao, kongen i Egypt, ubøyeleg i hjartet, så han sette etter israelittane. Men israelittane drog ut med lyft hand.

⁹Egyptarane sette etter dei med alle vognene, hestane og ryttarane og heile hæren til farao. Dei nådde dei att ved Pi-Hahirot, der dei låg i leir ved havet, framfor Baal-Safon.

¹⁰Då farao nærma seg, såg israelittane opp og fekk auge på egyptarane som kom etter dei. Dei vart gripne av stor redsle og ropa til HERREN.

¹¹Dei sa til Moses: «Fanst det ikkje graver nok i Egypt sidan du har ført oss ut i ørkenen for å døy? Kvifor har du gjort dette mot oss? Kvifor førte du oss ut frå Egypt?

¹²Var det ikkje det vi sa til deg i Egypt: Lat oss få vera i fred, vi vil arbeida for egyptarane! Det er betre for oss å arbeida for dei enn å døy i ørkenen.»

¹³Då sa Moses til folket: «Ver ikkje redde! Stå fast, så skal de få sjå at HERREN frelser dykk i dag! For slik de ser egyptarane i dag, skal de aldri meir sjå dei.

¹⁴HERREN skal strida for dykk, og de skal vera stille.»

¹⁵ HERREN sa til Moses: «Kvifor ropar du til meg? Sei til israelittane at dei skal dra vidare!

¹⁶Du skal lyfta staven din og retta handa ut over havet og kløyva det, så israelittane kan gå tørrskodde tvers igjennom havet.

¹⁷Sjå, eg gjer hjartet til egyptarane ubøyeleg, så dei set etter dei. Eg skal visa min herlegdom på farao og heile hans hær, på vognene og ryttarane hans.

¹⁸Egyptarane skal kjenna at eg er HERREN når eg viser min herlegdom på farao og vognene og ryttarane hans.»

¹⁹Guds engel, som hadde gått føre Israels leir, bytte no plass og gjekk etter folket. Skysøyla som var framfor dei, flytte seg og stilte seg bak dei,

²⁰så ho kom mellom leiren til egyptarane og leiren til israelittane. Og skya kom med mørker, men lyste likevel opp natta, så dei ikkje kom innpå kvarandre heile natta.

²¹Då rette Moses handa ut over havet, og HERREN dreiv havet bort med ein sterk austavind, som bles heile natta, så havet vart til tørt land. Vatnet vart kløyvd,

²²og israelittane gjekk tørrskodde tvers igjennom havet. Vatnet stod som ein mur til høgre og venstre for dei.

²³Egyptarane sette etter dei med alle hestane, vognene og ryttarane til farao, og følgde etter dei midt ut i havet.

²⁴[26] Men ved morgonvakta såg HERREN ned på leiren til egyptarane frå eldsøyla og skysøyla, og han skapte forvirring blant dei.

²⁵Han låste hjula på vognene deira så det vart tungt for dei å koma seg fram. Då sa egyptarane: «Lat oss rømma for israelittane! For HERREN kjempar for dei mot egyptarane.»

²⁶Då sa HERREN til Moses: «Rett handa ut over havet, så skal vatnet venda attende over egyptarane, over vognene og ryttarane deira!»

²⁷Så rette Moses handa ut over havet, og ved morgongry vende vatnet attende. Egyptarane rømde rett imot det, og HERREN støytte dei midt ut i havet.

²⁸Vatnet vende attende og skylde over alle vognene og ryttarane i hæren til farao, som hadde følgt etter israelittane ut i havet. Ikkje ein mann overlevde.

²⁹Men israelittane gjekk tørrskodde gjennom havet medan vatnet stod som ein mur til høgre og venstre for dei.

³⁰Den dagen frelste HERREN Israel frå handa til egyptarane. Israelittane såg at egyptarane låg døde på stranda.

³¹Då dei såg det storverket HERREN hadde gjort mot egyptarane, frykta folket HERREN, og dei trudde på HERREN og på Moses, tenaren hans.