Read nynorsk 2011 2. Mosebok 24 Bible Online

2. Mosebok 24 - nynorsk 2011 bible

2. Mosebok 24

¹Gud sa til Moses: «Kom opp til HERREN, du og Aron, Nadab og Abihu og sytti av dei eldste i Israel! Medan de enno er langt borte, skal de kasta dykk ned og tilbe!

²Berre Moses skal nærma seg HERREN, dei andre må ikkje koma nær. Og folket skal ikkje gå opp saman med han.»

³Moses kom og kunngjorde alle HERRENS ord og forskrifter for folket. Då svara dei samrøystes: «Alt HERREN har sagt, vil vi gjera.»

⁴Så skreiv Moses ned alle orda frå HERREN. Neste morgon stod han tidleg opp og bygde eit altar ved foten av fjellet og reiste tolv steinstøtter for Israels tolv stammar.

⁵Han sende ut nokre unge israelittar for å bera fram brennoffer og slakta oksar som fredsoffer for HERREN.

⁶Moses tok halvparten av blodet og helte det i skåler; den andre halvparten stenka han på altaret.

⁷[52] Så tok han paktboka og las henne høgt for folket, og dei sa: «Vi vil vera lydige og gjera alt HERREN har sagt.»

⁸Då tok Moses blodet, stenka det på folket og sa: «Sjå, dette er paktblodet, den pakta HERREN har gjort med dykk på grunnlag av alle desse orda.»

⁹Moses og Aron, Nadab og Abihu og sytti av dei eldste i Israel gjekk då opp

¹⁰og fekk sjå Israels Gud. Under føtene hans var det som eit golv av safir, klårt som himmelen sjølv.

¹¹Men mot Israels fremste menn lyfte han ikkje handa. Dei skoda Gud, og dei åt og drakk.

¹²Sidan sa HERREN til Moses: «Kom opp til meg på fjellet og bli der, så skal eg gje deg steintavlene, lova og boda som eg har skrive ned for å rettleia folket.»

¹³Då drog Moses i veg med Josva, tenaren sin. Og Moses gjekk opp på Guds fjell.

¹⁴Til dei eldste sa han: «Vent på oss her til vi kjem att! De har Aron og Hur hos dykk. Er det nokon som har ei sak, kan han gå til dei.»

¹⁵Så gjekk Moses opp på fjellet, og skya dekte fjellet.

¹⁶HERRENS herlegdom kvilte over Sinai-fjellet, og skya dekte det i seks dagar. Den sjuande dagen ropa Herren på Moses frå skya.

¹⁷Israelittane såg HERRENS herlegdom som ein øydande eld på fjelltoppen.

¹⁸Så gjekk Moses inn i skya og opp på fjellet. Og Moses vart verande på fjellet i førti dagar og førti netter.