Read nynorsk 2011 2. Mosebok 25 Bible Online

2. Mosebok 25 - nynorsk 2011 bible

2. Mosebok 25

¹ HERREN sa til Moses:

²Sei til israelittane at dei skal koma med ei offergåve til meg. De skal ta imot gåve frå kvar den som gjev av eit villig hjarte.

³Dette er gåvene de skal ta imot frå dei: gull, sølv og bronse,

⁴purpurblått, purpurraudt og karmosinraudt stoff, tøy av fint lin og geiteragg,

⁵raudfarga vêrskinn, andre fingarva skinn og akasietre,

⁶olje til lampene, krydra balsam til salvingsoljen og til den velluktande røykjelsen,

⁷[53] onyks-stein og andre steinar til å setja på efod-drakta og bryststykket.

⁸Lat dei reisa ein heilagdom for meg, så vil eg bu midt iblant dei.

⁹Denne bustaden og alt det som høyrer til i han, skal de laga nøyaktig etter den modellen eg viser deg.

¹⁰[54] De skal laga ei kiste av akasietre, to og ei halv alen lang, ei og ei halv alen brei og ei og ei halv alen høg.

¹¹Du skal kle henne med reint gull både innvendig og utvendig og laga ein gullkant rundt henne.

¹²Du skal støypa fire gullringar og festa dei i dei fire hjørna, to ringar på den eine sida og to ringar på den andre sida.

¹³Du skal laga berestenger av akasietre og kle dei med gull,

¹⁴og stikka stengene inn i ringane på begge sider slik at de kan bera kista med dei.

¹⁵Stengene skal alltid vera i ringane på kista; dei må aldri takast ut.

¹⁶[55] I kista skal du leggja vitnemålet som eg vil gje deg.

¹⁷[56] Du skal laga ein soningsstad av reint gull, to og ei halv alen lang og ei og ei halv alen brei.

¹⁸På kvar side av soningsstaden skal du laga to kjerubar av hamra gull,

¹⁹ein kjerub på den eine sida og ein kjerub på den andre sida. De skal laga dei slik at dei går i eitt med soningsstaden i begge endar.

²⁰Kjerubane skal lyfta vengene og breia dei utover slik at dei dekkjer soningsstaden. Kjerubane skal vera vende mot kvarandre, med andletet mot soningsstaden.

²¹Så skal du leggja soningsstaden som lok på kista, og i kista skal du leggja vitnemålet eg skal gje deg.

²²Der vil eg møta deg. Alt det eg pålegg deg å seia til israelittane, vil eg seia deg frå soningsstaden mellom dei to kjerubane som er over kista med vitnemålet.

²³[57] Du skal laga eit bord av akasietre, to alner langt, ei alen breitt og ei og ei halv alen høgt.

²⁴Du skal kle det med reint gull og laga ein gullkant rundt det.

²⁵Så skal du laga ei list til bordet. Ho skal vera ei handsbreidd tjukk og gå heilt rundt. Rundt lista skal du laga ein gullkant.

²⁶Du skal laga fire gullringar til bordet og setja ringane i dei fire hjørna ved dei fire føtene.

²⁷Ringane skal vera inntil lista. Dei skal vera haldarar for stengene som er til å bera bordet med.

²⁸Stengene skal du laga av akasietre og kle dei med gull. Med dei skal bordet berast.

²⁹Til bordet skal du laga fat og skåler, kanner og bollar til drikkofferet. Av reint gull skal du laga dei.

³⁰[58] Syt for at det alltid ligg skodebrød på bordet framfor andletet mitt!

³¹Du skal laga ein lysestake av reint gull. Lysestaken med fot og stamme og skålene med knoppar og blomar skal hamrast ut av eitt stykke.

³²Seks armar skal gå ut frå lysestaken, tre på den eine sida og tre på den andre sida.

³³På den første armen skal det vera tre skåler forma som ein mandelblom, kvar med knopp og blom; på den neste armen skal det vera tre skåler forma som ein mandelblom, kvar med knopp og blom. Slik skal det vera på alle dei seks armane som går ut frå lysestaken.

³⁴På sjølve staken skal det vera fire mandelforma skåler med knoppar og blomar.

³⁵Det skal vera ein knopp under det første armparet, ein under det andre og ein under det tredje, det vil seia under alle dei seks armane som går ut frå lysestaken.

³⁶Knoppane og armane skal gå i eitt med staken. Det heile skal hamrast ut av eitt stykke reint gull.

³⁷Du skal laga sju lamper til lysestaken. Du skal setja dei opp slik at dei kastar lys rett framfor staken.

³⁸Tengene og oskeskuffene som høyrer til, skal vera av reint gull.

³⁹[59] Lysestaken og alt utstyret skal lagast av ein talent reint gull.

⁴⁰Sjå til at du gjer arbeidet etter den modellen som vart synt deg på fjellet!