Read nynorsk 2011 2. Mosebok 26 Bible Online

2. Mosebok 26 - nynorsk 2011 bible

2. Mosebok 26

¹Du skal laga bustaden av ti teltdukar. Dei skal vera av fint, tvinna lin og purpurblått, purpurraudt og karmosinraudt stoff. I dukane skal du veva inn kjerubar i kunstvevnad.

²[60] Kvar duk skal vera tjueåtte alner lang og fire alner brei. Alle dukane skal ha same mål.

³Fem av teltdukane skal syast i hop til eitt stykke, og like eins dei andre fem dukane.

⁴Du skal laga purpurblå hemper langs kanten av den duken som er ytst på det eine samansydde stykket, og like eins langs kanten av den ytste duken på det andre stykket.

⁵Femti hemper skal du laga på den eine teltduken, og femti hemper i kanten av duken på det andre stykket. Hempene skal sitja rett mot kvarandre.

⁶Og du skal laga femti krokar av gull. Med dei skal du hekta dukane saman så bustaden blir ein heilskap.

⁷Du skal laga dukar av geiteragg til eit telt over bustaden. Elleve slike dukar skal du laga.

⁸[61] Kvar duk skal vera tretti alner lang og fire alner brei. Alle dei elleve dukane skal ha same mål.

⁹Fem av dukane skal du festa i hop for seg, og seks for seg. Den sjette duken, på framsida av teltet, skal du leggja dobbelt.

¹⁰I kanten av den duken som er ytst på det eine samansydde stykket, skal du laga femti hemper, og i kanten av det andre stykket femti hemper.

¹¹Og du skal laga femti krokar av bronse og hekta dei i hempene. Slik skal du festa teltet saman til ein heilskap.

¹²Den overskytande delen av dukane, den halve duken som blir til overs, skal hanga ned på baksida av bustaden.

¹³Og den eine alna som teltdukane er for lange på kvar side, skal hanga ned på begge sider av bustaden og dekkja han.

¹⁴Og over teltet skal du laga eit dekke av raudfarga vêrskinn, og over det att eit anna dekke av fingarva skinn.

¹⁵Plankane til bustaden skal du laga av akasietre. Dei skal stå loddrett.

¹⁶[62] Kvar planke skal vera ti alner lang og ei og ei halv alen brei.

¹⁷På kvar planke skal det vera to tappar som er tilpassa kvarandre. Slik skal du laga alle plankane til bustaden.

¹⁸Tjue av dei plankane du lagar, skal stå på sørsida, mot sør.

¹⁹Til dei tjue plankane skal du laga førti soklar av sølv, to soklar under kvar planke til å festa dei to tappane i.

²⁰På den andre sida av bustaden, på nordsida, skal det òg vera tjue plankar

²¹med førti soklar av sølv, to under kvar planke.

²²Til baksida av bustaden, mot vest, skal du laga seks plankar,

²³og i tillegg to plankar, ein til kvart hjørne på baksida av bustaden.

²⁴[63] Dei skal vera doble nedst og øvst og gå saman i éin ring. Slik skal det vera med dei begge; dei skal utgjera dei to hjørna.

²⁵Slik blir det åtte plankar og seksten soklar av sølv, to soklar til kvar planke.

²⁶Du skal laga tverrstenger av akasietre, fem til plankane på den eine sida av bustaden,

²⁷fem tverrstenger til plankane på den andre sida og fem tverrstenger til plankane på baksida av bustaden, mot vest.

²⁸Midtstonga, ho som står midt på plankane, skal gå tvers over, frå den eine enden til den andre.

²⁹Du skal kle plankane med gull, og ringane på dei, som skal vera haldarar for tverrstengene, skal du like eins laga av gull. Tverrstengene skal du òg kle med gull.

³⁰Så skal du reisa bustaden etter den forskrifta som vart synt deg på fjellet.

³¹Du skal laga eit forheng av purpurblått, purpurraudt og karmosinraudt stoff og fint, tvinna lin. Du skal laga det som kunstvevnad, med kjerubar.

³²Du skal hengja det opp på fire gullkledde søyler av akasietre som det er gullhakar på, og som står på fire soklar av sølv.

³³Rett under krokane skal du hengja det, og innanfor forhenget skal du setja kista med vitnemålet. Forhenget skal setja eit skilje mellom Det heilage og Det høgheilage.

³⁴Du skal leggja soningsstaden som lok på kista med vitnemålet i Det høgheilage.

³⁵Bordet skal du setja utanfor forhenget ved nordveggen. Lysestaken skal stå ved sørsida av bustaden, rett mot bordet.

³⁶Du skal laga eit teppe for inngangen til teltet. Det skal vera av purpurblått, purpurraudt og karmosinraudt stoff og fint, tvinna lin, alt i farga vevnad.

³⁷Til teppet skal du laga fem søyler av akasietre og kle dei med gull. På søylene skal det vera gullhakar, og du skal støypa fem soklar av bronse til dei.