Read nynorsk 2011 2. Mosebok 30 Bible Online

2. Mosebok 30 - nynorsk 2011 bible

2. Mosebok 30

¹Du skal laga eit altar til å brenna røykjelse på. Av akasietre skal du laga det.

²[79] Det skal vera firkanta, ei alen langt, ei alen breitt og to alner høgt. Horna på altaret skal gå i eitt med det.

³Både toppen, sidene og horna skal du kle med reint gull, og du skal laga ein gullkant rundt det.

⁴Nedanfor kanten på begge sider skal du setja to gullringar. Dei skal vera haldarar for berestengene på kvar side, så altaret kan berast.

⁵Stengene skal du laga av akasietre og kle dei med gull.

⁶[80] Du skal setja altaret framfor forhenget som gøymer kista med vitnemålet, framfor soningsstaden som ligg over det, der eg vil møta deg.

⁷Aron skal brenna velluktande røykjelse på det. Kvar morgon når han gjer i stand lampene, skal han brenna røykjelsen.

⁸Det same skal han gjera i skumringa når han tenner lampene. Det skal vera eit dagleg røykjelsesoffer for HERRENS andlet i slekt etter slekt.

⁹De skal ikkje ofra uvigsla røykjelse på altaret og ikkje brennoffer eller grødeoffer. De skal heller ikkje hella ut drikkoffer på det.

¹⁰Ein gong om året skal Aron gjera soning på altarhorna. Med blodet av det sonande syndofferet skal han gjera soning på altaret, i slekt etter slekt, ein gong om året. Altaret skal vera høgheilagt for HERREN.

¹¹ HERREN sa til Moses:

¹²Når du held manntal over israelittane, skal alle som blir talde, gje HERREN løysepengar for livet sitt, så inga plage skal råka dei når dei blir talde.

¹³[81] Kvar den som blir tald, skal gje ein halv sjekel etter den vekt dei nyttar i heilagdomen, der ein sjekel er tjue gera. Denne halve sjekelen skal vera ei offergåve til HERREN.

¹⁴Alle som blir talde, og som er over tjue år, skal gje ei offergåve til HERREN.

¹⁵Den rike skal ikkje gje meir og den fattige ikkje mindre enn ein halv sjekel når de gjev offergåva til HERREN til soning for livet dykkar.

¹⁶Du skal ta imot soningspengane frå israelittane og bruka dei til tenesta i teltheilagdomen. Det skal vera ei påminning om israelittane framfor HERRENS andlet til soning for livet dykkar.

¹⁷ HERREN sa til Moses:

¹⁸Du skal laga eit vaskefat av bronse med understell av bronse. Det skal du setja mellom teltheilagdomen og altaret og fylla med vatn.

¹⁹Aron og sønene hans skal vaska hendene og føtene i det.

²⁰Når dei går inn i teltheilagdomen, eller når dei stig fram for altaret for å gjera teneste og brenna gåveoffer for HERREN, skal dei vaska seg i vatnet, så dei ikkje må døy.

²¹Dei skal vaska hendene og føtene, så dei ikkje må døy. Det skal vera ei evig ordning for dei, for Aron og ætta hans, i slekt etter slekt.

²² HERREN sa til Moses:

²³[82] Ta krydra balsam av beste slag: 500 sjekel flytande myrra, halvparten så mykje eller 250 sjekel velluktande kanel, 250 sjekel velluktande sukkerrøyr

²⁴[83] og 500 sjekel kassia, alt etter vekta i heilagdomen, og dessutan ein hin olivenolje.

²⁵Av dette skal du laga ein heilag salvingsolje, ei velluktande blanding slik ein salveblandar gjer det. Ein heilag salvingsolje skal det vera.

²⁶Med den skal du salva teltheilagdomen, kista med vitnemålet,

²⁷bordet med alt som høyrer til, lysestaken med det som høyrer til, røykjelsesaltaret,

²⁸brennofferaltaret med alt som høyrer til, og fatet med understell.

²⁹Du skal helga dei så dei blir høgheilage. Kvar den som rører ved dei, blir heilag.

³⁰Og Aron og sønene hans skal du salva. Du skal helga dei til å gjera presteteneste for meg.

³¹Og du skal seia til israelittane: Dette skal vera min heilage salvingsolje i slekt etter slekt.

³²Han må ikkje hellast på kroppen til noko anna menneske, og de må ikkje laga nokon annan salve som er blanda slik. Heilag er han, og heilag skal han vera for dykk.

³³Den som lagar ei slik blanding og gjev henne til ein som ikkje er vigd, skal støytast ut frå folket sitt.

³⁴ HERREN sa til Moses: Ta deg velluktande røykjelsesstoff, balsamdropar, myrraolje, gummiharpiks og rein virak. Det skal vera like mykje av kvart.

³⁵Av det skal du laga blanda røykjelse, slik ein salveblandar gjer det, salta og rein og heilag.

³⁶Noko av det skal du knusa til pulver og leggja framfor vitnemålet i teltheilagdomen, der eg vil møta deg. Høgheilagt skal det vera for dykk.

³⁷Røykjelse som er slik blanda, må de ikkje laga til dykk sjølve. De skal halda han heilag for HERREN.

³⁸Den som lagar slik røykjelse berre for å nyta lukta, skal støytast ut frå folket sitt.