Read nynorsk 2011 2. Mosebok 31 Bible Online

2. Mosebok 31 - nynorsk 2011 bible

2. Mosebok 31

¹ HERREN sa til Moses:

²Eg har valt ut Besalel, son til Uri, son til Hur, frå Juda-stammen.

³Eg har fylt han med Guds ånd, med visdom og innsikt og med kunnskap og dugleik til alle slag handverk,

⁴så han kan tenkja ut og laga kunstverk i gull, sølv og bronse,

⁵slipa steinar til innfatningar, skjera ut i tre og gjera alt slag handverksarbeid.

⁶Til medhjelpar har eg gjeve han Oholiab, son til Ahisamak, frå Dan-stammen. Eg har gjeve visdom i hjartet til alle som har vit, så dei kan laga alt det eg har pålagt deg:

⁷teltheilagdomen, kista med vitnemålet, soningsloket over henne og alt som høyrer teltet til,

⁸bordet med det som høyrer til, lysestaken i reint gull med alt som høyrer til, røykjelsesaltaret,

⁹brennofferaltaret med alt som høyrer til det, vaskefatet med understell,

¹⁰prestedrakta, dei heilage kleda for presten Aron og kleda for sønene hans til prestetenesta,

¹¹salvingsoljen og den velluktande røykjelsen til heilagdomen. Dei skal gjera alt slik eg har pålagt deg.

¹² HERREN sa til Moses:

¹³Du skal seia til israelittane: Sabbatane mine skal de halda; for sabbaten er eit teikn mellom meg og dykk i slekt etter slekt, slik at de skal kjenna at det er eg, HERREN, som helgar dykk.

¹⁴De skal halda sabbaten; han skal vera heilag for dykk. Den som vanhelgar sabbaten, skal døy. Kvar den som gjer noko arbeid på han, skal støytast ut frå folket sitt.

¹⁵I seks dagar kan arbeid gjerast, men den sjuande dagen skal vera sabbat, ein heilag kviledag for HERREN. Kvar den som gjer noko arbeid på sabbatsdagen, skal døy.

¹⁶Israelittane skal verna om sabbaten, så dei held han i slekt etter slekt som ei evig pakt.

¹⁷Han skal vera eit teikn mellom meg og israelittane til evig tid. For på seks dagar skapte HERREN himmelen og jorda, men på den sjuande dagen kvilte han og pusta roleg ut.

¹⁸Då Herren var ferdig med å tala til Moses på Sinai-fjellet, gav han Moses dei to vitnemålstavlene, steintavlene som var skrivne med Guds finger.