Read nynorsk 2011 2. Mosebok 35 Bible Online

2. Mosebok 35 - nynorsk 2011 bible

2. Mosebok 35

¹Moses samla heile Israels forsamling og sa til dei: Dette er det HERREN har bode dykk å gjera:

²I seks dagar kan det arbeidast, men den sjuande dagen skal vera heilag for dykk. Han skal vera ein sabbat, ein kviledag for HERREN. Kvar den som gjer noko arbeid på den dagen, skal døy.

³De skal ikkje gjera opp eld i nokon av bustadene dykkar på sabbatsdagen.

⁴Moses tala til heile forsamlinga i Israel: Dette er det HERREN har gjeve påbod om:

⁵De skal gje ei offergåve til HERREN av det de eig! Kvar den som gjev av eit villig hjarte, skal koma til HERREN med gåva: gull, sølv og bronse,

⁶purpurblått, purpurraudt og karmosinraudt stoff, fint lin og geiteragg,

⁷raudfarga vêrskinn, andre fingarva skinn og akasietre,

⁸olje til lampene, krydra balsam til salvingsoljen og til den velluktande røykjelsen,

⁹onyks-stein og andre steinar til å setja på efod-drakta og bryststykket.

¹⁰Alle dei av dykk som har visdom i hjartet, skal koma og laga alt det som HERREN har bode dykk:

¹¹bustaden med telt og dekke, med krokar og plankar, tverrstenger, søyler og soklar,

¹²paktkista med stenger, soningsloket og forhengsteppet,

¹³bordet med stenger og alt som høyrer til, og skodebrøda,

¹⁴lysestaken med det som høyrer til, og lampene og oljen til lampene,

¹⁵røykjelsesaltaret med stenger, salvingsoljen, den velluktande røykjelsen og teppet framfor inngangen til bustaden,

¹⁶brennofferaltaret med bronserista, stengene og alt som høyrer til, og fatet med understell,

¹⁷omhenga til føregarden med søyler og soklar og teppet framfor porten til føregarden,

¹⁸pluggane og snorene til bustaden og føregarden,

¹⁹prestedraktene til tenesta i heilagdomen, dei heilage kleda for presten Aron og kleda for sønene hans til prestetenesta.

²⁰Så gjekk heile Israels forsamling bort frå Moses.

²¹Og alle som kjende seg drivne til det og hadde ei villig ånd, kom fram med offergåver til HERREN. Gåvene skulle brukast til arbeidet på teltheilagdomen og til all tenesta der, og til dei heilage kleda.

²²[91] Dei kom, både menn og kvinner. Alle som hadde eit villig hjarte, kom med naseringar, øyreringar, fingerringar og smykkesteinar — alle slag smykke av gull. Alle dei som ville bera fram eit svingeoffer av gull for HERREN, kom fram.

²³Kvar den som hadde purpurblått, purpurraudt og karmosinraudt stoff, fint lin og geiteragg, raudfarga vêrskinn og andre fingarva skinn, kom med det.

²⁴Alle som ville gje ei offergåve av sølv eller bronse, kom med gåva til HERREN, og alle som hadde akasietre, kom med det til alt byggjearbeidet.

²⁵Kvar kvinne som hadde visdom i hjartet til å spinna, kom med det ho hadde spunne i purpurblått, purpurraudt og karmosinraudt garn og fint lin.

²⁶Og alle kvinner som kjende seg drivne og hadde visdom til det, spann garn av geiteragg.

²⁷Leiarane kom med onyks-steinar og andre steinar til å setja på efod-drakta og bryststykket,

²⁸og krydra balsam og olje til lampene, salvingsoljen og den velluktande røykjelsen.

²⁹Kvar mann og kvinne som gav av eit villig hjarte, kom fram for å gje sitt til det arbeidet som HERREN gjennom Moses hadde bode dei å gjera. Slik bar israelittane fram ei frivillig offergåve til HERREN.

³⁰Moses sa til israelittane: Sjå, HERREN har valt ut Besalel, son til Uri, son til Hur frå Juda-stammen.

³¹Han har fylt han med Guds ånd, med visdom, innsikt og kunnskap, og med dugleik til alle slag handverk,

³²så han kan tenkja ut og laga kunstverk i gull, sølv og bronse,

³³slipa steinar til innfatning, skjera ut i tre og gjera alle slag kunsthandverk.

³⁴Han har gjeve han og Oholiab, son til Ahisamak frå Dan-stammen, evna til å læra opp andre.

³⁵Han har fylt dei med visdom i hjartet til å gjera alt slag handverk og kunstnarleg arbeid, og til å veva i farga garn og fint lin — i purpurblått, purpurraudt og karmosinraudt. Dei skal tenkja ut og laga kunsthandverk av alle slag.