Read nynorsk 2011 2. Mosebok 36 Bible Online

2. Mosebok 36 - nynorsk 2011 bible

2. Mosebok 36

¹Besalel og Oholiab skal arbeida saman med alle kloke menn som HERREN har gjeve visdom og innsikt, så dei veit korleis dei skal gjera alt arbeid som høyrer til tenesta i heilagdomen akkurat slik som HERREN har sagt.

²Så kalla Moses på Besalel og Oholiab og på alle dei kloke mennene som HERREN hadde gjeve visdom i hjartet, alle som kjende seg drivne til å ta fatt på arbeidet og fullføra det.

³Av Moses fekk dei alle offergåvene som israelittane hadde kome med til arbeidet og tenesta i heilagdomen. Men morgon etter morgon heldt folket fram med å koma med frivillige gåver.

⁴Då kom alle som hadde visdom til å gjera alt arbeidet på heilagdomen, kvar frå sitt arbeid,

⁵og sa til Moses: «Folket kjem med meir enn det som er naudsynt for å utføra det arbeidet som HERREN har pålagt oss.»

⁶Då baud Moses at det skulle ropast ut i leiren: «Ingen, korkje mann eller kvinne, skal leggja meir arbeid i offergåva til heilagdomen.» Slik vart folket hindra i å koma med meir.

⁷Det dei hadde gjeve, var nok til å få arbeidet gjort, ja, meir enn nok.

⁸Alle som hadde visdom i hjartet til dette arbeidet, laga no bustaden av ti teltdukar. Dei var av fint, tvinna lin og purpurblått, purpurraudt og karmosinraudt stoff. I dukane var det vove inn kjerubar i kunstvevnad.

⁹Kvar duk var tjueåtte alner lang og fire alner brei. Alle dukane hadde same mål.

¹⁰Fem av dukane skøytte dei saman, den eine med den andre, og like eins dei andre fem dukane.

¹¹Langs kanten av den duken som var ytst på det eine ihopskøytte stykket, laga dei purpurblå hemper, og like eins langs kanten av den ytste duken på det andre stykket.

¹²Femti hemper laga dei på den eine duken og femti hemper i kanten av duken på det andre stykket. Hempene sat rett imot kvarandre.

¹³Og dei laga femti krokar av gull. Med dei hekta dei dukane saman så bustaden vart ein heilskap.

¹⁴Dei laga dukar av geiteragg til eit telt over bustaden. Elleve slike dukar laga dei.

¹⁵Kvar duk var tretti alner lang og fire alner brei. Alle dei elleve dukane hadde same mål.

¹⁶Fem av dukane skøytte dei saman for seg, og seks for seg.

¹⁷I kanten av den ytste duken på det eine samansydde stykket sette dei femti hemper, og i kanten av det andre stykket femti hemper.

¹⁸Og dei laga femti krokar av bronse så teltet kunne festast saman til ein heilskap.

¹⁹Deretter laga dei eit dekke av raudfarga vêrskinn til å ha over teltet, og over det att eit anna dekke av fingarva skinn.

²⁰Plankane til bustaden laga dei av akasietre. Dei stod loddrett.

²¹Kvar planke var ti alner lang og ei og ei halv alen brei.

²²På kvar planke var det to tappar som var tilpassa kvarandre. Slik laga dei alle plankane til bustaden.

²³Av plankane dei laga til bustaden, sette dei opp tjue på sørsida, mot sør.

²⁴Til dei tjue plankane laga dei førti soklar av sølv, to soklar under kvar planke til å festa dei to tappane i.

²⁵På den andre sida av bustaden, på nordsida, laga dei òg tjue plankar

²⁶med førti soklar av sølv, to under kvar planke.

²⁷Til baksida av bustaden, mot vest, laga dei seks plankar,

²⁸og i tillegg to plankar, ein til kvart hjørne på baksida av bustaden.

²⁹Dei var doble nedst og øvst og gjekk saman i éin ring. Slik var det med dei begge; dei utgjorde dei to hjørna.

³⁰Såleis vart det åtte plankar og seksten soklar av sølv, to soklar under kvar planke.

³¹Dei laga tverrstenger av akasietre, fem til plankane på den eine sida av bustaden,

³²fem tverrstenger til plankane på den andre sida og fem tverrstenger til plankane på baksida av bustaden, mot vest.

³³Midtstonga sette dei slik at ho gjekk tvers over, frå den eine enden til den andre, midt på plankane.

³⁴Plankane kledde dei med gull, og ringane på dei som var haldarar for tverrstengene, laga dei av gull. Tverrstengene kledde dei òg med gull.

³⁵Dei laga eit forheng av purpurblått, purpurraudt og karmosinraudt stoff og fint, tvinna lin. Det var laga i kunstvevnad, med kjerubar.

³⁶Dei laga fire søyler av akasietre til å hengja det på og kledde dei med gull. Hakane på dei var òg av gull. Og dei støypte fire soklar av sølv til dei.

³⁷For inngangen til teltet laga dei eit teppe av purpurblått, purpurraudt og karmosinraudt stoff og fint, tvinna lin, alt i farga vevnad.

³⁸Til teppet laga dei fem søyler med hakar. Søylehovuda og banda kledde dei med gull, men dei fem soklane var av bronse.