Read nynorsk 2011 2. Mosebok 39 Bible Online

2. Mosebok 39 - nynorsk 2011 bible

2. Mosebok 39

¹Av det purpurblå, purpurraude og karmosinraude stoffet laga dei prestedrakta til tenesta i heilagdomen. Dei laga dei heilage kleda til Aron, slik som HERREN hadde bode Moses å gjera.

²Efod-drakta laga dei av gull, purpurblått, purpurraudt og karmosinraudt stoff og fint, tvinna lin.

³Gullet hamra dei ut i plater og skar det opp til tråd, så det kunne vevast inn i det purpurblå, purpurraude og karmosinraude stoffet og i det fine linet, alt i kunstvevnad.

⁴Til efod-drakta laga dei aksleband som var feste i hjørna og heldt henne i hop.

⁵Beltet som sat fast på efoden, gjekk i eitt med drakta. Det var òg vove av gull, purpurblått, purpurraudt og karmosinraudt garn og fint, tvinna lin, slik HERREN hadde bode Moses.

⁶[101] Dei sette onyks-steinane i innfatningar av gull. På steinane var namna til Israels søner graverte inn, som i eit signet.

⁷Dei sette dei på akslebanda til efoden. Dei skulle minna om Israels søner, slik HERREN hadde bode Moses.

⁸Dei laga bryststykket i kunstvevnad, på same måten som efod-drakta. Det var av gull, purpurblått, purpurraudt og karmosinraudt stoff og fint, tvinna lin.

⁹Bryststykket var firkanta og bretta dobbelt. Det var eitt fingerspenn langt og eitt fingerspenn breitt når det var lagt dobbelt.

¹⁰Dei sette fire rader med steinar på det. I den eine rada var det ein rubin, ein topas og ein smaragd,

¹¹i den andre rada ein turkis, ein safir og ein diamant,

¹²i den tredje rada ein opal, ein agat og ein ametyst

¹³og i den fjerde rada ein krysolitt, ein onyks og ein jade. Dei vart sette inn i innfatningar av gull.

¹⁴Dei tolv steinane bar namna på Israels søner, ein for kvart namn. På kvar stein var namnet på ein av dei tolv stammane gravert inn, slik som i eit signet.

¹⁵Til bryststykket laga dei kjeder av reint gull. Dei var fletta slik ein flettar snorer.

¹⁶Dei laga òg to innfatningar og to ringar av gull. Ringane sette dei i kvart sitt hjørne av bryststykket.

¹⁷Dei to gullsnorene feste dei i dei to ringane i hjørna på bryststykket.

¹⁸Dei to andre endane av gullsnorene feste dei til dei to innfatningane, og sette dei på akslebanda til efod-drakta, på framsida.

¹⁹Så laga dei to gullringar til og sette dei i dei to andre hjørna av bryststykket, ved den indre kanten som vender inn mot efod-drakta.

²⁰Så laga dei endå to gullringar og sette dei nedst på dei to akslebanda, på framsida ved saumen over beltet på efoden.

²¹Ringane på bryststykket batt dei til ringane på efod-drakta med ei purpurblå snor, slik at bryststykket vart sitjande over beltet og ikkje kunne losna frå drakta, slik HERREN hadde bode Moses.

²²Kappa som høyrer til efod-drakta, var voven i einsfarga, purpurblått stoff.

²³Midt på kappa var det ei opning som på ei brynje, og rundt opninga var det ein kant, slik at ho ikkje kunne rivna.

²⁴Nedst rundt kappekanten sette dei granateple av tvinna purpurblått, purpurraudt og karmosinraudt garn.

²⁵Dei laga også bjøller av reint gull og sette dei mellom granatepla rundt heile kappekanten.

²⁶Ei bjølle og eit granateple, ei bjølle og eit granateple rundt heile kanten av kappa som skulle brukast i tenesta, slik HERREN hadde bode Moses.

²⁷Til Aron og sønene hans laga dei òg kjortlar vovne av fint lin,

²⁸ein turban av fint lin, pynta turbanar av fint lin, bukser av fint, tvinna lin

²⁹og eit belte av fint, tvinna lin, i purpurblå, purpurraud og karmosinraud farga vevnad, slik HERREN hadde bode Moses.

³⁰Dei laga ei plate av reint gull. Det var det heilage diademet. På den skreiv dei, slik ein graverer inn i eit signet: «Helga til HERREN».

³¹Dei sette ei purpurblå snor på plata og feste henne oppe på turbanen, slik HERREN hadde bode Moses.

³²Såleis vart alt arbeidet fullført på bustaden, teltheilagdomen. Israelittane gjorde alt slik som HERREN hadde bode Moses.

³³Og dei kom med bustaden til Moses: teltet med alt utstyret som høyrde til, krokane, plankane, tverrstengene, søylene, soklane,

³⁴dekket av raudfarga vêrskinn, dekket av fingarva skinn, forhengsteppet,

³⁵kista med vitnemålet og berestengene, soningsloket,

³⁶bordet med alt som høyrde til, skodebrøda,

³⁷lysestaken av reint gull med lamper som skulle setjast i rad, og alt som høyrde til, oljen til lampene,

³⁸det gullkledde altaret, salvingsoljen, den velluktande røykjelsen, teppet til inngangen til teltet,

³⁹bronsealtaret med bronserista, berestenger og alt som høyrde til, vaskefatet med understell,

⁴⁰omhenga til føregarden med søyler og soklar, teppet framfor porten til føregarden, snorene, pluggane, alt utstyret som skulle brukast til tenesta i bustaden, teltheilagdomen,

⁴¹prestedrakta til tenesta i heilagdomen, dei heilage kleda for presten Aron og kleda for sønene hans til prestetenesta.

⁴²Som HERREN hadde bode Moses, slik hadde israelittane gjort alt arbeidet.

⁴³Moses såg på alt det som var gjort, og sjå, dei hadde gjort det slik som HERREN hadde sagt. Og Moses velsigna dei.