Read nynorsk 2011 2. Mosebok 40 Bible Online

2. Mosebok 40 - nynorsk 2011 bible

2. Mosebok 40

¹ HERREN sa til Moses:

²Den første dagen i den første månaden skal du reisa bustaden, teltheilagdomen.

³Der skal du setja kista med vitnemålet og hengja forhenget framfor henne.

⁴Du skal setja inn bordet og ordna det som høyrer til. Så skal du bera inn lysestaken og setja opp lampene på den.

⁵Framfor kista med vitnemålet skal du setja det gullkledde røykjelsesaltaret, og framfor inngangen til bustaden skal du hengja opp teppet.

⁶Brennofferaltaret skal du setja framfor inngangen til bustaden, til teltheilagdomen.

⁷Vaskefatet skal du setja mellom teltheilagdomen og altaret og ha vatn i det.

⁸Du skal setja opp føregarden heilt rundt og hengja opp teppet framfor porten.

⁹Så skal du ta salvingsoljen og salva bustaden og alt som i han er, og du skal helga han og alt utstyret, så det blir heilagt.

¹⁰Du skal salva brennofferaltaret og alt som høyrer til, og du skal helga altaret, så det blir høgheilagt.

¹¹Du skal òg salva vaskefatet og understellet og helga det.

¹²Så skal du føra Aron og sønene hans fram til inngangen i teltheilagdomen og vaska dei med vatn.

¹³Du skal kle Aron i dei heilage kleda, salva han og helga han til å vera prest for meg.

¹⁴Du skal òg føra sønene hans fram og kle dei i kjortlar.

¹⁵Du skal salva dei, slik du salva far deira, så dei kan vera prestar for meg. Denne salvinga skal gje dei retten til prestedømet, i slekt etter slekt, til evig tid.

¹⁶Moses gjorde i eitt og alt som HERREN hadde bode han.

¹⁷Den første månaden i det andre året, på den første dagen i månaden, vart bustaden reist.

¹⁸Det var Moses som reiste han. Han sette soklane på plass og reiste plankane, la inn tverrstengene og reiste søylene.

¹⁹[102] Han breidde teltet ut over bustaden, og ovanpå det la han dekket, slik som HERREN hadde bode Moses.

²⁰Så tok Moses vitnemålet og la det i paktkista, sette berestengene i og la soningsstaden som lok på kista.

²¹Han sette kista inn i bustaden og hengde forhengsteppet opp slik at det dekte for kista med vitnemålet, slik som HERREN hadde bode Moses.

²²Han sette bordet inn i teltheilagdomen, på nordsida av bustaden, utanfor forhenget.

²³På det la han brøda til rette for HERRENS andlet, slik som HERREN hadde bode Moses.

²⁴Lysestaken sette han i teltheilagdomen rett imot bordet, på sørsida av bustaden.

²⁵Lampene sette han opp for HERRENS andlet, slik som HERREN hadde bode Moses.

²⁶Det gullkledde altaret sette han òg i teltheilagdomen, framfor forhenget.

²⁷Han brende velluktande røykjelse på det, slik som HERREN hadde bode Moses.

²⁸Så hengde Moses opp teppet framfor inngangen til bustaden.

²⁹Brennofferaltaret sette han ved inngangen til bustaden, til teltheilagdomen, og han ofra brennoffer og grødeoffer på det, slik som HERREN hadde bode Moses.

³⁰Vaskefatet sette han mellom teltheilagdomen og altaret, og han helte vatn i det til å vaska seg med.

³¹I det vaska Moses og Aron og sønene hans hendene og føtene.

³²Dei vaska seg når dei skulle gå inn i teltheilagdomen, og når dei skulle stiga fram for altaret, slik som HERREN hadde bode Moses.

³³Så laga han til føregarden rundt bustaden og altaret, og han hengde teppet opp framfor porten til føregarden. Slik fullførte Moses arbeidet.

³⁴[103] Så dekte skya teltheilagdomen, og HERRENS herlegdom fylte bustaden.

³⁵Moses kunne ikkje gå inn i teltheilagdomen, fordi skya hadde teke bustad over teltet og HERRENS herlegdom fylte bustaden.

³⁶Kvar gong skya lyfte seg frå bustaden, braut israelittane opp og heldt fram med si vandring.

³⁷Men når skya ikkje lyfte seg, braut dei ikkje opp før den dagen ho lyfte seg att.

³⁸For HERRENS sky låg over bustaden om dagen, og om natta lyste ho som eld for auga på heile Israels hus, så lenge vandringa varte.