Read nynorsk 2011 Job 10 Bible Online

Job 10 - nynorsk 2011 bible

Job 10

¹ Eg avskyr mitt eige liv. No gjev eg mi klage fritt løp, vil tala med bittert sinn.

² Eg seier til Gud: Ikkje døm meg skuldig! Lat meg få vita kvifor du fører sak mot meg!

³ Har du glede av å undertrykkja, av å vraka dine henders verk, medan du lèt sola gå opp over planane til urettferdige?

⁴ Har du auge som eit menneske, ser du slik skapningar ser?

⁵ Er dine dagar som menneskedagar og dine leveår som mannens år?

⁶For du spør etter mi skuld og leitar etter mi synd,

⁷endå du veit at eg ikkje er skuldig. Ingen kan bergast frå di hand.

⁸ Di hand forma og laga meg, men no angrar du og utslettar meg!

⁹ Hugs, du laga meg av leire, og no lét du meg venda attende til støv!

¹⁰Du helte meg opp som mjølk og lét meg storkna som ost.

¹¹ Du kledde meg med hud og kjøt, med knoklar og sener vov du meg.

¹² Du gav meg liv og alt som godt er, du verna og vakta mi livskraft.

¹³Men dette gøymde du i hjartet, dette veit eg du hadde i tankar:

¹⁴ Om eg syndar, vaktar du på meg og vil ikkje frikjenna meg for skuld.

¹⁵Er eg skuldig, så ve meg! Og sjølv om eg har rett, kan eg ikkje lyfta hovudet; eg er mett av skam og har nok av naud.

¹⁶ Står eg likevel oppreist, jagar du meg som ei løve, igjen og igjen gjer du underlege ting mot meg.

¹⁷Du finn nye vitne mot meg, viser meg aukande uvilje og sender hær etter hær mot meg.

¹⁸ Kvifor hjelpte du meg ut or mors liv? Var eg berre død før noko auge fekk sjå meg!

¹⁹ Då var eg som om eg aldri var til, boren frå mors liv til grava.

²⁰ Kor få mine levedagar er! Kan han ikkje la meg vera, så får eg litt glede

²¹ før eg går bort til landet med mørker og dødsskugge og aldri vender attende,

²²eit land så mørkt som svarte natta, der det rår dødsskugge, ikkje orden, der lyset er som mørkret.