Read nynorsk 2011 Job 13 Bible Online

Job 13 - nynorsk 2011 bible

Job 13

¹Auga mine har sett alt, øyra har høyrt og forstått.

² Det de veit, veit eg òg, eg står ikkje tilbake for dykk.

³Likevel må eg tala til Den veldige, eg ønskjer å gå i rette med Gud!

⁴ Men de smør løgna utover, kvakksalvarar er de alle saman.

⁵ Om de berre ville teia! Då kunne de reknast for vise!

⁶Høyr på forklaringa mi, gjev akt på forsvaret mitt!

⁷ Vil de vitna for Gud med urett, tala hans sak med svik?

⁸Er det Gud de tek parti for? Er det hans sak de fører?

⁹ Går det då godt når han ransakar dykk? Kan de narra han slik de narrar menneske?

¹⁰Nei, han ville refsa dykk strengt om de tok parti i løynd.

¹¹ Skulle ikkje hans velde skremma dykk, hans skrekk falla over dykk?

¹²Visdomsorda dykkar er oske, og svara dykkar er av leire.

¹³Tei stilt og lat meg føra ordet, kva som enn skjer med meg!

¹⁴Eg tygg på mitt eige kjøt, eg går med livet i hendene.

¹⁵Han vil drepa meg, eg har ikkje noko håp, likevel vil eg forsvara mine vegar for hans andlet.

¹⁶ Kanskje blir dette mi redning, for ingen ugudeleg kan koma fram for han.

¹⁷Lytt vel til talen min, lat forklaringa klinga i øyra!

¹⁸ Sjå, eg legg fram mi sak, eg veit at eg har rett.

¹⁹Kan nokon vinna ei sak mot meg? Då vil eg teia og døy.

²⁰ [22] Skån meg berre for to ting, så slepp eg å løyna meg for deg:

²¹ Ta handa di bort frå meg, og lat ikkje redslene dine skremma meg!

²²Rop, så skal eg svara, eller lat meg tala, så svarar du!

²³ Kvar er mi skuld og mine synder? Kunngjer mitt brot og mi synd!

²⁴ Kvifor løyner du andletet og reknar meg som din fiende?

²⁵ Vil du då skremma eit blad som blæs bort, forfølgja eit vise halmstrå?

²⁶ Ditt klageskrift mot meg er bittert, du lèt meg bøta for min ungdoms synder.

²⁷ Du set føtene mine i blokka. Du vaktar på alle mine stigar, merkjer av kvart fotspor.

²⁸Mennesket er som ròte, det blir utslite som mølletne klede.