Read nynorsk 2011 Job 16 Bible Online

Job 16 - nynorsk 2011 bible

Job 16

¹Då tok Job til ords og sa:

²Eg har høyrt nok av dette; de er elendige trøystarar, alle saman.

³Blir det ikkje slutt på tomme ord? Kva er det som driv deg til å svara?

⁴ Eg kunne òg ha tala slik som de dersom det var dykkar liv det gjaldt, og ikkje mitt. Eg kunne ha halde fine talar og rist på hovudet av dykk.

⁵Eg ville sett mot i dykk med munnen og lagt band på mine skjelvande lepper.

⁶Talar eg, blir mi smerte ikkje mindre. Held eg opp, blir ho ikkje borte.

⁷ Men no har han gjort meg trøytt. Du utrydda alle som høyrde meg til.

⁸ Du greip meg, og det vart eit vitnemål mot meg. Mi vanmakt talar meg rett opp i andletet.

⁹ Hans vreide riv sund, han forfølgjer meg! Han skjer tenner mot meg, fienden min dolkar meg med blikket.

¹⁰ Dei opnar gapet mot meg og slår meg hånleg på kinnet. Saman går dei mot meg.

¹¹Gud har overgjeve meg til vonde menneske, kasta meg i armane på lovlause.

¹² Eg levde i fred, då riste han meg, greip meg i nakken og slo meg sund. Han sette meg opp som skyteskive,

¹³pilene hans kom imot meg frå alle kantar. Utan medynk gjennombora han nyrene mine, gallen rann til jorda.

¹⁴Han flengde meg opp, sår på sår, storma mot meg som ein krigar.

¹⁵Sekk har eg sydd til kroppen min, eg har lagt mi kraft i støvet.

¹⁶Andletet er raudt av gråt, det svartnar for auga,

¹⁷ endå hendene ikkje er merkte av vald og bøna mi er rein.

¹⁸ [23] Å, jord, gøym ikkje mitt blod, legg ikkje mitt skrik i grav!

¹⁹Framleis har eg eit vitne i himmelen, éin i det høge som talar mi sak.

²⁰Venene mine spottar meg, i gråt vender eg auga mot Gud.

²¹Måtte han gje ein mann rett hos Gud og gje eit menneske rett mot sin neste!

²² For om få år må eg fara den stigen som ikkje fører attende.