Read nynorsk 2011 Job 18 Bible Online

Job 18 - nynorsk 2011 bible

Job 18

¹Då tok Bildad frå Sjuah til ords og sa:

²Kor lenge? Når vil de gjera slutt på pratinga? Tenk dykk om, og så kan vi snakka saman!

³Kvifor skulle vi bli rekna som fe? Er vi så dumme i dykkar auge?

⁴Raseriet ditt riv deg sund. Skulle jorda bli lagd aud for di skuld, og berget flytta seg?

⁵ Lyset til den urettferdige brenn ut, logen frå elden lyser ikkje meir.

⁶Lyset i teltet hans går ut, og lampa sloknar for han.

⁷ Hans sterke steg blir hindra, hans eigen plan feller han.

⁸ Føtene hans går i garnet, han blir fanga i nettet.

⁹Ei snare sit rundt hælen, ei lykkje held han fast.

¹⁰Eit reip ligg gøymt på jorda, ei felle på hans stig.

¹¹ Redslene omringar han, dei jagar i hælane på han.

¹²Ulukke hungrar etter han. Undergang ventar på hans fall.

¹³ Sjukdom fortærer huda hans. Dødens førstefødde et han opp.

¹⁴ [24] Han blir riven bort frå sitt trygge telt og ført til redslekongen.

¹⁵ Redsla slår seg ned i teltet han forlét. Svovel regnar over buplassen hans.

¹⁶ Nede tørkar røtene hans, oppe visnar greinene.

¹⁷ Minnet om han blir borte frå landet, han har ikkje meir eit namn der ute.

¹⁸Han blir driven frå lyset til mørkret, blir jaga frå verda.

¹⁹ Born har han ikkje, ingen etterkomar i folket, ingen overlevande der han budde.

²⁰På hans dag grøssar dei i vest, i aust blir dei gripne av redsle.

²¹ Sanneleg, slik går det med bustaden til vonde menneske, med staden til den som ikkje kjenner Gud.