Read nynorsk 2011 Job 19 Bible Online

Job 19 - nynorsk 2011 bible

Job 19

¹Då tok Job til ords og sa:

²Kor lenge vil de plaga meg og knusa meg med ord?

³Det er tiande gongen de spottar meg og utan skam går laus på meg.

⁴Har eg verkeleg feila, så må eg sjølv leva med feilen.

⁵Vil de heva dykk over meg, så vis at mi vanære er fortent!

⁶ Men vit at Gud gjer meg urett når han spenner sitt garn omkring meg.

⁷ Eg ropar om vald utan å bli høyrd. Eg skrik om hjelp, men det finst ingen rett.

⁸ Han stengjer vegen, eg når ikkje fram. Han legg mine stigar i mørker.

⁹Æra tek han frå meg, riv krona av hovudet mitt.

¹⁰ Han bryt meg heilt ned, eg må gå bort. Håpet mitt rykkjer han opp som eit tre.

¹¹ Vreiden hans flammar mot meg, han reknar meg som sin motstandar.

¹²No kjem alle troppane hans, dei marsjerer mot meg og omringar teltet mitt.

¹³ Brørne mine held seg på avstand, kjenningane mine er som framande.

¹⁴Dei næraste er borte, dei som kjende meg, har gløymt meg.

¹⁵Huslyd og tenestejenter reknar meg som ein framand; ein utlending er eg i deira auge.

¹⁶Ropar eg på tenaren, svarar han ikkje; eg må be han audmjukt om hjelp.

¹⁷Anden min er ekkel for kona mi, eg vekkjer avsky hos min eigne born.

¹⁸Sjølv gutungar foraktar meg. Når eg reiser meg, talar dei mot meg.

¹⁹Dei fortrulege venene viser no avsky, dei eg elskar, vender seg mot meg.

²⁰ Eg er ikkje anna enn skinn og bein, tannlaus må eg berga meg.

²¹ Spar meg, ja, spar meg, vener! For Guds hand har rørt ved meg.

²²Kvifor jagar de meg slik også Gud gjer? Blir de aldri mette av mitt kjøt?

²³Om berre mine ord vart skrivne ned, om dei vart innførte i ein bokrull,

²⁴forma med griffel av jern og med bly, rissa i stein for alltid!

²⁵ [25] Eg veit at min utløysar lever. Som den siste skal han stå fram i støvet.

²⁶ [26] Når huda er riven av meg og kjøtet er borte, skal eg sjå Gud.

²⁷ Mine auge ser, det er eg som får sjå han, ikkje ein framand. Mitt indre fortærest av lengsel!

²⁸De seier: «Lat oss jaga han. Årsaka finst hos han.»

²⁹ Frykt heller de sjølve for sverdet; for sverdet brenn mot urett, og de skal få kjenna at det finst ein dom.