Read nynorsk 2011 Job 22 Bible Online

Job 22 - nynorsk 2011 bible

Job 22

¹Då tok Elifas frå Teman til ords og sa:

²Kan vel ein mann hjelpa Gud? Nei, den kloke hjelper berre seg sjølv.

³ Har Den veldige glede av di rettferd? Tener han på at du er heil i di ferd?

⁴Er det for gudsfrykta di han klagar deg og stemner deg for retten?

⁵Er ikkje vondskapen din stor og skulda utan ende?

⁶ Du tok pant frå brørne dine utan grunn, drog av dei siste plagga deira.

⁷ Den utmatta nekta du vatn, du heldt brød tilbake frå den svoltne.

⁸Den sterke eigde landet, den fornemme fekk bu der.

⁹ Enkjer sende du tomhendte bort, du knuste styrken til dei farlause.

¹⁰ Difor er snarer sette omkring deg, brå redsle grip deg.

¹¹Eller ser du ikkje mørkret, vassflaumen som kjem over deg?

¹² Er ikkje Gud høgt i himmelen? Sjå dei øvste stjernene, kor langt oppe dei er!

¹³ Du seier: «Kva veit vel Gud? Kan han dømma gjennom tett skodde?

¹⁴ Skyer dekkjer så han ikkje ser der han vandrar over himmelbogen.»

¹⁵ Vil du følgja den gamle stigen som ugjerningsmenn gjekk,

¹⁶ dei som vart rivne for tidleg bort då flaumen skylde vekk grunnvollen deira?

¹⁷ Dei hadde sagt til Gud: «Gå frå oss! Kva gjer vel Den veldige for oss?»

¹⁸ Men han hadde fylt husa deira med alt godt. Lat planane til urettferdige vera langt frå meg!

¹⁹ Dei rettferdige såg det og jubla, dei uskuldige spotta:

²⁰«Der forsvinn motstandarane våre, og elden fortærer restane.»

²¹ Forlik deg med han og slutt fred, så får du alt godt tilbake.

²²Ta imot rettleiing frå hans munn, legg deg talen hans på hjartet.

²³ Vend attende til Den veldige, så får du oppreising. Hald urett borte frå teltet ditt!

²⁴ [28] Kast gullet ditt i støvet, Ofir-gullet mellom steinar i bekken,

²⁵ så skal Den veldige vera gull for deg, ja, det finaste sølv.

²⁶ Du har di glede i Den veldige. Du lyfter andletet mot Gud.

²⁷ Du bed til han, og han høyrer deg. Du innfrir det du har lova.

²⁸Det du set deg føre, skal lukkast. Lys skal stråla over vegane dine.

²⁹ Når det går nedover, skal du seia: «Opp!» Han frelser dei som slår auga ned.

³⁰ Han bergar jamvel den som ikkje er uskuldig; ved dine reine hender blir han berga.