Read nynorsk 2011 Job 23 Bible Online

Job 23 - nynorsk 2011 bible

Job 23

¹Då tok Job til ords og sa:

²Framleis er klaga mi trassig, endå eg dempar mine stønn med hard hand.

³Om eg berre kunne finna han, stiga inn i hans tronsal,

⁴då ville eg leggja fram mi sak for han, fylla munnen med motbevis.

⁵ Då kunne eg få vita kva han ville svara, og forstå kva han vil seia meg.

⁶Ville han bruka si store makt i saka mot meg? Å nei, han ville nok høyra på meg.

⁷Så drøfte eg saka ærleg med han, og dommaren sette meg fri for alltid.

⁸ Går eg mot aust, er han ikkje der, går eg mot vest, merkar eg han ikkje.

⁹Arbeider han i nord, veit eg det ikkje. Og snur han mot sør, ser eg det ikkje.

¹⁰ Men han kjenner den vegen eg følgde. Prøver han meg, kjem eg ut som gull.

¹¹ Føtene mine gjekk i hans spor, eg følgde hans veg og veik ikkje av.

¹² Eg braut ikkje boda frå leppene hans, orda frå hans munn gøymde eg i mitt indre.

¹³ Han er den einaste; kven kan hindra han? Det han har lyst til, det gjer han.

¹⁴Han fullfører det han har fastsett for meg, og meir av same slag har han i tankar.

¹⁵ Difor er eg redd for å møta han. Eg tenkjer etter og blir slegen av skrekk.

¹⁶Gud gjer meg motlaus, Den veldige skremmer meg.

¹⁷Men eg teier ikkje i møte med mørkret, når bekmørkret dekkjer meg.