Read nynorsk 2011 Job 27 Bible Online

Job 27 - nynorsk 2011 bible

Job 27

¹Job heldt fram med visdomstalen sin og sa:

² Så sant Gud lever, han som nektar meg retten, Den veldige, han som gjer meg bitter:

³ Så lenge det er livsande i meg, pust frå Gud i nasen min,

⁴ skal leppene mine ikkje tala urett og tunga ikkje bera fram svik.

⁵ Fri meg frå å gje dykk rett! Eg er uskuldig, det står eg ved til eg døyr.

⁶ Eg held på mi rettferd og slepper ikkje, hjartet fordømmer ingen av dagane mine.

⁷Lat fienden min stå som skuldig, motstandaren som urettferdig!

⁸ Kva håp har den ugudelege av det han har vunne, når Gud gjer ende på livet hans?

⁹ Høyrer Gud klageropa hans når trengsler kjem over han?

¹⁰ Har han si glede i Den veldige? Ropar han seint og tidleg på Gud?

¹¹ Eg vil læra dykk om Guds hand og ikkje skjula kva Den veldige har tenkt.

¹² De har då sett det, alle saman, så kvifor dette tomme snakket?

¹³Slik er den delen ein lovlaus får av Gud, den arven valdsmannen får frå Den veldige:

¹⁴ Har han mange born, fell dei for sverd, etterkomarane får ikkje metta seg med brød.

¹⁵Dei som overlever, går i død og grav, og inga enkje held sørgjehøgtid.

¹⁶Han haugar opp sølv som støv og samlar seg klede som leire;

¹⁷ han samlar, men rettferdige kler seg, uskuldige deler sølvet.

¹⁸ Det huset han byggjer, er som ein møll, som lauvhytta vaktmannen lagar.

¹⁹Han legg seg rik, men det varer ikkje: Han slår auga opp, og alt er borte.

²⁰ Redsler når han att som ein vassflaum, om natta fører stormen han vekk.

²¹Austavinden lyfter han og fører han bort, sopar han av stad,

²²kastar seg over han utan skånsel og er så sterk at han må rømma.

²³ Vinden slår hendene saman og plystrar han hånleg bort frå hans stad.