Read nynorsk 2011 Job 28 Bible Online

Job 28 - nynorsk 2011 bible

Job 28

¹Sølvet har sine gruver, gullet sin stad der det blir vaska ut.

²Jern blir henta ut or jorda, og kopar blir smelta ut av stein.

³Dei gjer ende på mørkret, i fjerne krokar finn dei stein løynd i svarte mørkret.

⁴Dei bryt sjakter langt frå der menneske bur. På gløymde stader, der ingen fot trødde, heng dei og dinglar, langt frå folk.

⁵Jorda ber fram føde, men i djupet blir ho elta rundt med eld.

⁶I steinane der nede er safir, der finst det gullstøv òg.

⁷Ingen rovfugl kjenner stigen dit, den har ikkje noko falkeauge sett.

⁸Der trør ikkje stolte rovdyr, inga løve går på stigen.

⁹Mennesket legg hand på harde steinen og endevender fjell frå grunnen.

¹⁰Dei sprengjer seg gangar i berget, og auga får sjå alle slag kostbare ting.

¹¹Dei stoppar til vassårer og dreg det løynde fram i lyset.

¹² Men visdomen, kvar finst han? Kvar har forstanden sin bustad?

¹³Mennesket veit ikkje kva forstanden er verd. Han finst ikkje i landet til dei levande.

¹⁴Djupet seier: «I meg er han ikkje», og havet seier: «Han er ikkje hos meg.»

¹⁵ Han kan ikkje kjøpast for det finaste gull, prisen kan ikkje vegast i sølv;

¹⁶han kan ikkje betalast i Ofir-gull, i kostbar onyks eller safir.

¹⁷Han kan ikkje målast i gull eller glas, ingen kan byta han til seg for skåler av finaste gull.

¹⁸ Korall og bergkrystall kan ikkje eingong nemnast; å eiga visdom er betre enn perler.

¹⁹Han kan ikkje målast i topas frå Kusj, ikkje betalast med det reinaste gull.

²⁰Kvar kjem då visdomen frå? Kvar har forstanden sin bustad?

²¹Visdomen er løynd for kvart levande auge, gøymd for fuglane under himmelen.

²²Avgrunnen og døden seier: «Vi har berre høyrt om han.»

²³ Gud kjenner vegen til visdomen. Han veit kvar han har sin bustad.

²⁴Han skodar til heimsens endar, alt under himmelen kan han sjå.

²⁵Då han gav vinden vekt og lét vatnet få rette mål,

²⁶då han sette ei grense for regnet og fastla vegar for lyn og tore,

²⁷ då såg han visdomen og målte han, stilte han opp og granska han.

²⁸ Så sa han til mennesket: Å frykta Herren, det er visdom, å venda seg bort frå det vonde, det er forstand.