Read nynorsk 2011 Job 29 Bible Online

Job 29 - nynorsk 2011 bible

Job 29

¹Job heldt fram med visdomstalen sin og sa:

² Kunne eg få det som i farne månader, dei dagane då Gud vakta over meg,

³då hans lampe skein over hovudet mitt og eg gjekk gjennom mørkret i hans lys,

⁴ slik eg hadde det i mine velmaktsdagar då Gud var min fortrulege i mitt telt,

⁵då Den veldige framleis var med meg og borna mine var rundt meg,

⁶ då eg vassa i rømme og bekker av olje rann frå berget hos meg.

⁷Når eg gjekk ut til byporten og tok sete på torget,

⁸trekte dei unge seg tilbake så snart dei såg meg, og dei gamle reiste seg og stod.

⁹ Hovdingar heldt orda attende, la handa over munnen.

¹⁰Stormenns røyster tagna, tunga klistra seg til ganen.

¹¹Når dei fekk høyra om meg, prisa dei meg lukkeleg. Kvar den som såg meg, tala lovord.

¹² For eg redda den fattige som ropa om hjelp, den farlause som ingen hjelpar hadde.

¹³Den forkomne velsigna meg, eg fekk enkjers hjarte til å jubla.

¹⁴ Rettferd var kleda eg kledde meg i, rettsinn var som kappe og turban.

¹⁵Eg var auge for den blinde og føter for den lamme.

¹⁶ Eg var far for dei fattige og granska saka for dei eg ikkje kjende.

¹⁷Eg knuste kjeven på dei som gjorde urett, og redda rovet ut av gapet på dei.

¹⁸Eg sa: «Eg får døy blant mine eigne, dagane mine blir talrike som sandkorn.

¹⁹Røtene mine når til vatnet, og nattedogg kviler i greinene.

²⁰Mi ære blir stadig fornya, og bogen i handa mi får ny spenst.»

²¹Dei lytta til meg og fekk håp, dei tagde når eg gav dei råd.

²² Når eg hadde tala, tok ingen til motmæle; orda mine draup ned over dei.

²³Dei venta på min tale som på regn, med munnen open som mot vårregn.

²⁴Når eg smilte til dei, kunne dei ikkje tru det. Dei ville ikkje sleppa lyset frå andletet mitt.

²⁵Eg valde veg for dei og sat som leiar, trona som ein konge framfor hærflokken, som ein trøystar for dei sørgjande.