Read nynorsk 2011 Job 3 Bible Online

Job 3 - nynorsk 2011 bible

Job 3

¹Til sist opna Job munnen og forbanna den dagen han vart fødd.

²Job tok til ords og sa:

³ Bort med den dagen eg vart fødd, den natta det vart sagt: «Ein gut er unnfanga.»

⁴Den dagen — lat han bli mørker, så Gud i det høge ikkje spør etter han og dagslys aldri fell på han!

⁵Lat mørker og dødsskugge få han, lat skyer kvila over han og formørking skremma han!

⁶Den natta — lat mørke skuggar ta henne så ho ikkje finst mellom dagane i året og ikkje kjem med når månader skal teljast.

⁷Ja, måtte den natta bli ufruktbar og glederop ikkje høyrast.

⁸ [11] Lat dei lysa forbanning over henne, dei som manar fram ulukkedagar, dei som kan vekkja Leviatan.

⁹Lat hennar morgonstjerner slokna, lat ho venta på lys som ikkje kjem, og aldri sjå morgonròden slå auga opp!

¹⁰For ho stengde ikkje morlivs dører for meg og løynde ikkje lidinga for auga mine.

¹¹ Kvifor døydde eg ikkje då eg vart fødd, anda ut då eg kom frå mors liv?

¹²Kvifor tok dei meg på fanget, la meg til brystet for å suga?

¹³No kunne eg ha lege i ro, sovna og så fått kvila

¹⁴ med kongar og rådgjevarar på jorda, dei som bygde der det no er ruinar,

¹⁵eller med stormenn som hadde gull og fylte husa sine med sølv.

¹⁶ Då hadde eg ikkje vore til, lik eit foster som døyr i løynd, lik eit spedbarn som aldri såg dagens lys.

¹⁷I grava har dei urettferdige rasa frå seg, der kviler dei som har tømt sine krefter.

¹⁸Fangar har fred, dei høyrer ikkje vaktarens rop.

¹⁹ Der er både små og store, der er tenaren fri frå herren sin.

²⁰Kvifor gjev dagen lys til den som lid, og liv til dei ulukkelege,

²¹ til dei som ventar fåfengt på døden og søkjer døden meir enn løynde skattar,

²²til dei som glade ville ha jubla og fryda seg om dei fann ei grav,

²³ til ein mann som ikkje finn veg fordi Gud stengjer for han?

²⁴ Mine sukk har vorte mitt brød, klageropa mine strøymer som vatn.

²⁵Det eg fryktar mest, er over meg. Det eg gruar for, kjem no.

²⁶ Eg får ikkje fred, ikkje ro, ikkje kvile, så opprørt er eg.