Read nynorsk 2011 Job 31 Bible Online

Job 31 - nynorsk 2011 bible

Job 31

¹ Eg gjorde ein avtale med auga mine at eg ikkje skulle sjå på noka jente.

²Kva del fekk eg elles av Gud i himmelen, kva arv frå Den veldige i det høge?

³Kjem ikkje uhell til den som gjer urett, rammar ikkje ulukke den som gjer vondt?

⁴ Ser ikkje han min veg, tel han ikkje kvart steg?

⁵Har eg ferdast i løgn? Har føtene hasta til svik?

⁶ Lat Gud vega meg på rettferds vekt, så vil han forstå at eg er uskuldig.

⁷ Om stega mine bøygde av frå vegen, om hjartet følgde der auga flyg, om hendene vart ureine,

⁸så lat andre få eta det eg har sådd, lat spirene mine bli rykte opp med rota.

⁹Om hjartet lét seg lokka av noka kvinne og eg låg på lur ved døra til min neste,

¹⁰så kan kona mi mala korn for ein annan og andre få bøya seg ned over henne!

¹¹ For det ville vera vondskap, ein urett som fortener straff,

¹²ein eld som et seg ned til avgrunnen, utryddar alt som veks etter meg.

¹³Krenkte eg retten når eg hadde sak med slaven eller slavekvinna mi,

¹⁴kva skulle eg då gjera når Gud reiste seg? Når han forhøyrde meg, kva skulle eg svara?

¹⁵ Han som laga meg i mors liv, har òg laga den andre. Den same danna oss i morslivet.

¹⁶ Har eg nekta fattige det dei ønskte, sløkt gløden i auga til enkjer?

¹⁷Åt eg alt brødet sjølv så ikkje farlause fekk mat?

¹⁸Nei, frå eg var ung, har eg vore som ein far for dei, frå første stund tok eg meg av enkjer.

¹⁹Kunne eg sjå folk bukka under fordi dei ikkje hadde klede, at den fattige mangla noko å kle seg med?

²⁰Velsigna han meg ikkje for varm ull frå lamma mine?

²¹ Har eg lyft handa mot ein farlaus når eg såg at eg fekk medhald i retten?

²²Då vil skuldra losna frå nakken og armen gå ut or ledd.

²³ For Guds ulukker skremmer meg, eg kan ikkje stå meg imot hans velde.

²⁴ Har eg sett mi lit til gull, sagt til det edle metallet: «Eg stolar på deg»?

²⁵ Har eg gledd meg fordi rikdomen auka, fordi eg fekk hand om så mykje?

²⁶Har eg, når sola stråla fram og månen steig i sin glans,

²⁷ [35] late meg hemmeleg lokka til å helsa dei med handkyss?

²⁸ Nei, det er ein urett som fortener straff; då ville eg ha fornekta Gud i det høge.

²⁹ Har eg gledd meg over fiendens undergang, fryda meg når ulukka ramma han?

³⁰ Eg lét ikkje munnen synda slik at eg forbanna nokon og ønskte han død.

³¹Dei som budde i mine telt, sa då: «Alle blir metta av kjøtet på hans bord.»

³² Ein innflyttar overnatta aldri ute; døra mi var alltid open.

³³ [36] Har eg løynt mi synd, slik folk gjer, gøymt mi ugjerning ved barmen

³⁴fordi eg frykta mengda, var knust av forakt frå slektningar så eg tagde og ikkje gjekk ut?

³⁵Om berre nokon ville høyra på meg! Sjå, her er mi underskrift, lat no Den veldige svara meg! Om berre motparten min sette opp eit skriv!

³⁶ Då ville eg bera det på skuldrene mine, binda det som ein krans om hovudet!

³⁷ Eg vil gjera rekneskap for alle mine steg, tre fram for han som ein fyrste.

³⁸Om åkeren min skrik mot meg og alle plogfòrene græt,

³⁹har eg ete åkerens kraft utan vederlag og blåse ut livet for jordeigaren,

⁴⁰ så lat det koma opp tornar i staden for kveite og ugras i staden for bygg! Jobs tale er fullført.