Read nynorsk 2011 Job 32 Bible Online

Job 32 - nynorsk 2011 bible

Job 32

¹Desse tre mennene heldt opp med å svara Job fordi han såg seg sjølv som rettferdig.

²[37] Elihu, son til Barakel frå Bus, av Ram-slekta, vart då fylt av harme. Vreiden hans flamma opp mot Job, som meinte seg å vera meir rettferdig enn Gud.

³Også på dei tre venene var han sint fordi dei ikkje tok til motmæle, endå dei meinte at Job var skuldig.

⁴Elihu hadde venta med å tala til Job fordi dei andre var eldre enn han.

⁵Men då Elihu såg at det ikkje fanst svar i munnen til dei tre mennene, vart han brennande harm.

⁶Difor tok Elihu, son til Barakel frå Bus, til ords og sa: Eg er ung av år, og de er gamle. Difor var eg redd, våga ikkje å seia mi meining til dykk.

⁷ Eg tenkte: «Lat alderen tala, lat dei mange år bera fram visdom!»

⁸ Men det er ånda som er i mennesket, pusten frå Den veldige, som fører til innsikt.

⁹ Det er ikkje talet på år som gjev visdom, dei gamle veit ikkje alltid kva som er rett.

¹⁰Difor seier eg: Høyr på meg! Eg òg vil seia mi meining.

¹¹For eg venta medan de tala, lytta etter forstand medan de leita etter ord.

¹²Eg høyrde nøye på dykk, men ingen har vist at Job tek feil, ingen har gjeve han svar på tiltale.

¹³Sei ikkje: «Vi har funne visdom hos han. Berre Gud kan vinna over han, ikkje menneske.»

¹⁴For han har enno ikkje retta talen sin til meg, og eg skal ikkje svara han slik de gjorde.

¹⁵Dei er mållause og svarar ikkje meir, orda sviktar dei.

¹⁶Skulle eg venta når dei ikkje talar, når dei berre står der utan svar?

¹⁷Eg òg må ha rett til å tala, eg òg vil seia mi meining.

¹⁸ For eg blir fylt av ord, ånda i mitt bryst driv meg.

¹⁹ Mitt bryst er lik uopna vin, lik nyfylte skinnsekker som held på å rivna.

²⁰Eg vil letta trykket ved å tala, opna leppene og gje svar.

²¹Eg gjer ikkje forskjell på folk, vil ikkje smigra nokon,

²²for smiger veit eg ikkje av. Elles kunne min skapar snart rykkja meg opp.