Read nynorsk 2011 Job 33 Bible Online

Job 33 - nynorsk 2011 bible

Job 33

¹Men høyr på det eg seier, Job, lytt til orda mine.

²Sjå, eg opnar gapet, tunga talar i munnen.

³Eg talar av eit ærleg hjarte, leppene snakkar klårt om det eg veit.

⁴Ånda frå Gud har laga meg, pusten frå Den veldige gjev meg liv.

⁵Svar meg om du kan! Stå opp og legg fram di sak!

⁶ Sjå, for Gud er vi like, også eg er forma av leire.

⁷ Redsle for meg skal ikkje skremma deg, handa mi skal ikkje tyngja deg.

⁸Du sa så eg høyrde det — klåre stod orda for meg:

⁹ «Eg er rein og utan synd, plettfri er eg, fri for skuld.

¹⁰ Men Gud har klagemål mot meg og held meg for sin fiende.

¹¹ Han set føtene mine i blokka og vaktar på alle mine stigar.»

¹²Eg svarar: «Der har du ikkje rett! For Gud er større enn menneske.»

¹³Kvifor klagar du han for ikkje å svara på menneskeord?

¹⁴Gud talar éin gong, så éin gong til, men folk merkar det ikkje.

¹⁵I ein draum, eit syn om natta, når folk har falle i djup søvn eller slumrar i senga,

¹⁶ opnar han øyra deira og forseglar dei med formaning,

¹⁷for at menneske skal halda opp med det dei gjer, og mannens hovmod bli borte.

¹⁸ Gud vil redda han frå å gå i grav, berga livet hans frå sverdet.

¹⁹ Mannen blir tukta med smerter på sitt leie, med ein stadig kamp i knoklane.

²⁰Mat byd han imot, han orkar ikkje lekre retter.

²¹ Kjøtet tærest bort så ein ikkje ser det. Knoklane, som ein før ikkje såg, ligg berre.

²² Livet hans går mot grava, han nærmar seg dei som drep.

²³Er det då ein engel hos han, ein talsmann mellom tusen, som kan seia mennesket kva som er rett,

²⁴ så er han nådig og seier: «Fri han frå å gå i grav! Eg har fått løysepengar.»

²⁵ Så blir kroppen sterkare enn då han var ung, han får ungdomens dagar tilbake.

²⁶ Han bed til Gud, som gleder seg over han, med fryd ser han Guds andlet, han som lèt mennesket få att si rettferd.

²⁷Han ser på menneska og seier: «Eg synda, eg krenkte retten, men han gjengjelde det ikkje.

²⁸Han fria meg frå å gå i grav. Eg lever og ser lyset.»

²⁹Sjå, alt dette gjer Gud for mennesket, både to og tre gonger.

³⁰ Han fører det opp or grava til strålande lys hos dei levande.

³¹Høyr etter, Job, og lytt til meg! Ver stille, så eg kan få tala!

³²Har du noko å seia, så svar meg! Tal, eg gjev deg gjerne rett.

³³Men har du ikkje svar, så lytt! Ver stille, så skal eg læra deg visdom.