Read nynorsk 2011 Job 34 Bible Online

Job 34 - nynorsk 2011 bible

Job 34

¹Elihu tok igjen til ords og sa:

²Høyr mine ord, de vise! Lytt til meg, de som har kunnskap!

³ Øyret prøver jo orda slik ganen smakar på maten.

⁴Så lat oss velja det som er rett, og saman finna ut kva som er godt.

⁵ Job har sagt: «Eg er rettferdig, Gud har sett min rett til sides.

⁶ Eg har rett, men blir halden for løgnar. Eg er utan synd, men ei drepande pil har såra meg.»

⁷Finst det ein mann som Job? Han fyller munnen med spott slik andre drikk vatn.

⁸ Han reiser i følgje med dei som gjer vondt, og ferdast med dei urettferdige,

⁹ for han har sagt: «Ein mann har ikkje nytte av å søkja gunst hos Gud.»

¹⁰ Men de forstandige, høyr heller på meg: Det er langt frå Gud å vera urettferdig, og frå Den veldige å gjera vondt.

¹¹ Han gjev oss att for våre handlingar, gjev løn etter gjerning.

¹²Sann mine ord: Gud gjer ikkje urett, Den veldige fordreiar ikkje retten.

¹³Kven har gjeve han tilsyn med jorda, kven har overlate heile verda til han?

¹⁴Om han berre tenkte på seg sjølv og heldt anden, pusten sin, tilbake,

¹⁵ då ville kvar levande skapning døy og mennesket venda attende til støv.

¹⁶Har du forstand, så høyr dette! Lytt til det eg seier!

¹⁷Kan ein som foraktar retten, dømma andre? Dømmer du den skuldig som er mektig og rettferdig?

¹⁸Vil nokon kalla kongen ein kjeltring, eller seia: «skuldig» til stormenn?

¹⁹ Men Gud tek ikkje omsyn til hovdingar, vel ikkje rikfolk framfor fattige. Dei er alle verk av hans hand.

²⁰ Dei døyr i hast midt på natta, folk blir skaka opp og går til grunne. Sjølv mektige vik, men ikkje for menneskehand.

²¹ Guds auge følgjer kvar manns vegar, kvart steg ser han.

²² Ikkje noko mørker, ingen dødsskugge kan løyna dei som gjer urett.

²³Han gjev ikkje lang frist før mennesket må møta i Guds rett.

²⁴ Han knuser mektige utan forhøyr, set andre i deira stad.

²⁵Han legg merke til det dei gjer. Ei natt slår han dei over ende og knuser dei.

²⁶Han straffar dei som lovlause ein stad der alle ser.

²⁷For dei vende seg bort frå han og gav ikkje akt på hans vegar.

²⁸ Då nådde ropet frå dei fattige til han, han høyrde skriket frå dei hjelpelause.

²⁹Om Gud teier, kven kan dømma han? Om han løyner andletet, kven kan sjå han? Han er over kvart folkeslag og kvart menneske,

³⁰så ingen ugudeleg får vera konge og leggja snarer for folket.

³¹ Har vel du sagt til Gud: «Eg har gjort ein eid og vil ikkje bruka vald.

³²Og det eg sjølv ikkje ser, må du visa meg så eg ikkje held fram med å synda.»

³³Skal Gud løna deg som du ønskjer når du avviser han? Det er du som må velja, ikkje eg. Sei det du veit!

³⁴Kvar vis mann som høyrer på meg, ja, alle forstandige menneske, vil seia til meg:

³⁵ «Job talar utan kunnskap, orda hans manglar meining.

³⁶Lat Job for alltid prøvast, han svarar som ein ugjerningsmann.

³⁷Han legg brot til si synd og spottar midt iblant oss, bruker store ord mot Gud.»