Read nynorsk 2011 Job 35 Bible Online

Job 35 - nynorsk 2011 bible

Job 35

¹Elihu tok igjen til ords og sa:

²Tenkjer du at dette er rett, seier du at du er meir rettferdig enn Gud,

³ sidan du spør: «Kva gagnar det meg, kva hjelper det at eg lèt vera å synda?»

⁴Eg skal svara deg og venene dine:

⁵Lyft blikket mot himmelen og sjå, legg merke til kor høgt skyene er over deg!

⁶ Kva gjer det vel Gud om du syndar? Alle dine brot, kva har dei å seia for han?

⁷ Og er du rettferdig, kva gjev du då han, kva kan han ta imot frå di hand?

⁸Uretten din rammar medmenneska dine, berre menneske har gagn av rettferda di.

⁹Folk skrik under tung undertrykking, ropar etter hjelp mot dei mektige.

¹⁰ Dei spør ikkje: «Kvar er Gud, han som skapte meg, som lèt lovsong lyda om natta,

¹¹som lærer oss meir enn dyra på jorda, gjer oss klokare enn fuglane under himmelen?»

¹²Dei ropar, men får ikkje svar når dei møter vondskap og overmot.

¹³ Det er løgn at Gud ikkje høyrer, at Den veldige ikkje ser.

¹⁴ Jamvel når du seier at du ikkje ser han, ser han di sak, og du må venta på han.

¹⁵Men om no Gud ikkje straffar i vreide og ikkje bryr seg om store ord,

¹⁶ då fer Job med tomt snakk, skjønar lite, men pratar mykje.