Read nynorsk 2011 Job 36 Bible Online

Job 36 - nynorsk 2011 bible

Job 36

¹Elihu heldt fram og sa:

²Ha litt tolmod med meg, så skal eg læra deg noko; for eg har meir å seia om Gud.

³Mi innsikt hentar eg langt bortanfrå, eg viser at skaparen min har rett.

⁴Orda mine er ikkje løgn; du står framfor ein som veit alt.

⁵Sjå, Gud er mektig, men avviser ingen; mektig er hans styrke og innsikt.

⁶ Han held ikkje liv i den urettferdige, men lèt hjelpelause få sin rett.

⁷ Han tek ikkje auga frå dei rettferdige; med kongar kjem dei på trona, han lèt dei sitja for alltid og opphøgjer dei.

⁸Blir dei bundne med lenkjer, fanga i ulukke-snarer,

⁹så vil han seia dei kva dei har gjort, at dei synda då dei opphøgde seg.

¹⁰ Han opnar øyra deira for å åtvara og byd dei å venda om frå urett.

¹¹ Om dei då lyder og tener han, vil dei leva godt alle sine dagar og enda sine år i lukke.

¹²Men om dei ikkje lyder, vil dei falla for sverd, omkoma i sin uforstand.

¹³Eit ugudeleg hjarte ber på harme. Dei ropar ikkje om hjelp når Gud har bunde dei.

¹⁴Dei døyr i sin ungdom, endar sitt liv blant tempelprostituerte menn.

¹⁵ Gud bergar hjelpelause i deira naud, opnar øyra deira i trengslene.

¹⁶ Så vil han òg føra deg ut or trengsles gap, til ope landskap utan farar der bordet ditt er fullt av feite retter.

¹⁷Du fullfører dommen over dei lovlause, lov og rett skal ramma dei.

¹⁸ Pass på så ikkje nokon lokkar deg med overflod, lat ikkje løysepengar føra deg på avvegar!

¹⁹Kan skriket ditt fria deg frå trengsle om du så bruker all di kraft?

²⁰ Du skal ikkje lengta etter den natta då folkeslag blir rykte opp med rot.

²¹Akta deg, vend deg ikkje mot vondskap, for du vel heller vondskap enn liding.

²² Sjå, Gud er opphøgd i sitt velde. Kven er ein lærar som han?

²³ Kven peikar ut den vegen han skal følgja? Kven kan seia at han gjer urett?

²⁴ Gløym ikkje å prisa hans verk, det alle menneske syng om.

²⁵Alle menneske ser det, dei skimtar det langt borte.

²⁶ Sjå, Gud er opphøgd, men vi forstår ikkje, hans år kan vi ikkje telja.

²⁷ Han dreg vassdropar opp til seg. Dei blir til regn, til ei Guds kjelde

²⁸som strøymer frå skyene og fell på mange menneske.

²⁹ Kan nokon forstå korleis skyene breier seg ut, korleis det tornar under hans bustad?

³⁰Sjå, han breier lyn omkring seg og løyner havsens djup.

³¹Slik held han dom over folka, og slik gjev han mat i overflod.

³²Han kler hendene sine i lyn og sender dei mot sitt mål.

³³Torebrak melder at han kjem, sjølv buskapen varslar det når han dreg fram.