Read nynorsk 2011 Job 37 Bible Online

Job 37 - nynorsk 2011 bible

Job 37

¹Ja, dette får hjartet til å skjelva, til å hoppa i brystet mitt.

² Lytt til braket av røysta hans, høyr korleis det drønnar frå munnen hans!

³Han lèt lyn fara rundt heile himmelen, sender dei til heimsens endar.

⁴Etterpå rullar tora, det er den mektige røysta hans som rungar. Han held ikkje lyna att når røysta hans høyrest.

⁵ Gud gjer under med si torerøyst, gjer storverk vi ikkje fattar.

⁶ Til snøen seier han: «Fall ned på jorda», like eins til regnet, det kraftige ausregnet.

⁷Han set segl på kvar menneskehand, så alle menneske skal kjenna hans gjerning.

⁸Villdyra går til hòlene sine, må halda seg i hi.

⁹Stormen fer ut av kammeret sitt, nordavinden kjem med kulden.

¹⁰Når Gud pustar, blir det frost, vassflata frys til.

¹¹Han fyller skyene med vatn, breier ut toreskyene sine.

¹² Dei driv rundt, seglar etter hans plan for dei. Alt han byd, gjer dei over heile den vide jord.

¹³Han lèt dei koma, somme for å straffa, somme for å gagna jorda hans, somme for å gjera vel mot henne.

¹⁴ Høyr på dette, Job! Stans og erkjenn Guds under!

¹⁵Forstår du korleis Gud gjev skyene bod og lèt lyn skyta fram frå dei?

¹⁶Forstår du korleis skyene kan sveva? Dette er hans verk, han som veit alt.

¹⁷Du som får kleda varma opp når jorda døser etter sønnavinden,

¹⁸kan du hjelpa han med å hamra ut himmelkvelven fast som ein spegel av støypt metall?

¹⁹Sei oss kva vi skal svara han! I vårt mørker får vi ikkje fram eit ord.

²⁰Skal han få bod om at eg vil tala? Kven ønskjer vel å gå under?

²¹No ser ikkje folk lyset, det er berre ein kvit flekk i skylaget; men så kjem vinden og feiar skyene bort.

²² Frå nord kjem eit gylle skin, Guds skremmande lysglans.

²³ Den veldige finn vi ikkje; han er opphøgd i makt og rett. Stor er hans rettferd; han undertrykkjer ingen.

²⁴Difor fryktar menneska han, men han overser dei som trur dei er vise.