Read nynorsk 2011 Job 38 Bible Online

Job 38 - nynorsk 2011 bible

Job 38

¹Då svara HERREN Job ut av stormen og sa:

²Kven er dette som formørkjer min plan med uforstandige ord?

³ [38] Spenn beltet om livet som ein mann, så vil eg spørja deg, og du skal svara:

⁴ Kvar var du då eg grunnla jorda? Fortel det, om du veit det!

⁵ Kven har fastsett hennar mål — det veit du vel? Kven drog målesnora over henne?

⁶Kvar vart pilarane under jorda slegne ned, og kven la hjørnesteinen

⁷ [39] medan alle morgonstjerner jubla og alle gudesøner ropa av fryd?

⁸Kven stengde for havet med portar då det fossa fram frå morslivet,

⁹då eg kledde havet med skyer og sveipte det i skodde,

¹⁰ då eg sette grense for det, stengde med slå for porten?

¹¹Eg sa: «Hit kjem du, men ikkje lenger. Her skal dei stolte bølgjene dine brytast.»

¹²Har du nokon gong kalla morgonen fram eller vist morgonròden staden hans

¹³ [40] så han kan ta tak i endane av jorda og rista dei lovlause bort?

¹⁴Då blir jorda omforma som leire under eit stempel, alt står fram som i ny drakt.

¹⁵ Dei urettferdige mistar det lyset dei hadde. Armen dei lyfte, blir knust.

¹⁶Har du nådd fram til havsens kjelder? Har du gått rundt på botnen av urdjupet?

¹⁷ [41] Har dødens portar synt seg for deg, har du sett dødsskuggens dører?

¹⁸Forstår du viddene på jorda? Sei frå om du kjenner alt dette.

¹⁹Kvar går vegen til bustaden for lyset, og kvar held mørkret til?

²⁰ Du kan føra mørkret til landet der det bur, om du kjenner stigane dit!

²¹ Du veit det, for du var vel fødd den gongen! Ja, dine dagars tal er stort.

²²Har du nådd fram dit snøen har sitt kammer, og sett lageret med hagl

²³ som eg sparer til trengselstider, til dagen med kamp og krig?

²⁴ Kvar går vegen dit lyset deler seg og austavinden blæs ut over jorda?

²⁵ Kven laga laup for styrtregnet, veg for tore og brak,

²⁶så det regna over land der ingen bur, i ørkenen der det ikkje er menneske?

²⁷ Regnet metta det aude landet så graset grodde grønt.

²⁸ Har regnet ein far? Kven har avla doggdropane?

²⁹Kva for eit morsliv kjem isen frå? Kven har fødd rimet som fell frå himmelen?

³⁰Vatnet kler seg ut som stein, overflata av djupet blir dekt av is.

³¹Kan du knyta Sjustjerne-bandet eller løysa Orions lenkjer?

³² [42] Fører du stjernebileta fram i rett tid, leier du Store bjørn og dei små bjørnane?

³³Kjenner du himmelens lover? Styrer du stjernehimmelens makt over jorda?

³⁴Kan du lyfta røysta di til skyene slik at vatnet fløymer ned over deg?

³⁵Kan du senda ut lyn så dei fer av stad og seier til deg: «Her er vi»?

³⁶ [43] Kven gjev visdom til ibisfuglen og forstand til hanen?

³⁷Kven er så vis at han kan telja skyene? Kven heller vatn or himmelkrukkene

³⁸når molda storknar som malm og jordklumpane klistrar seg saman?