Read nynorsk 2011 Job 4 Bible Online

Job 4 - nynorsk 2011 bible

Job 4

¹Då tok Elifas frå Teman til ords og sa:

²Om ein vil tala til deg, orkar du det? Men kven kan vel teia?

³ Sjølv har du rettleidd mange og styrkt kraftlause hender.

⁴Dine ord reiste opp den som snubla. Du gav kraft til skjelvande kne.

⁵ Men no, når det råkar deg, blir du motlaus. Det treffer deg, og du blir lamslegen.

⁶ Stolar du ikkje på di gudsfrykt? Gjev ikkje den fromme livsvegen din håp?

⁷ Tenk etter! Når gjekk vel ein skuldfri til grunne, kvar vart rettskafne utsletta?

⁸ Eg ser at dei som pløyer vondskap og sår liding, haustar det same.

⁹Når Gud pustar, går dei til grunne. Når han fnyser, er dei borte.

¹⁰ Brølet frå løva, skriket frå hannløva og tennene til ungløva er slegne ut.

¹¹Rovdyret manglar bytte og døyr. Løveflokken blir spreidd.

¹² Eit ord kom smygande til meg. Eg høyrde det kviskra

¹³i opprivande, nattlege syn medan menneska sov djupt.

¹⁴Skrekken greip meg, og eg skalv. Redsla gjekk gjennom merg og bein.

¹⁵Ein pust strauk forbi andletet mitt, fekk håra på kroppen til å reisa seg.

¹⁶ Han stod der, men eg kjende han ikkje, ein skapnad rett for auga mine. Eg høyrde ei kviskrande røyst:

¹⁷ Kan vel eit menneske vera rettferdig for Gud? Kan ein mann vera rein for sin skapar?

¹⁸ [12] Gud stolar ikkje eingong på tenarane sine, han finn feil hos sendeboda,

¹⁹ [13] og endå meir hos dei som bur i leirhus og har jord til grunnvoll. Dei blir lettare knuste enn møll.

²⁰Frå morgon til kveld blir dei trakka ned. Dei går til grunne for alltid utan at nokon bryr seg om det.

²¹ Teltsnora blir rykt opp. Dei døyr, utan visdom.