Read nynorsk 2011 Job 40 Bible Online

Job 40 - nynorsk 2011 bible

Job 40

¹Då svara HERREN Job ut av stormen og sa:

² [44] Spenn beltet om livet som ein mann, så vil eg spørja deg, og du skal svara.

³ Vil du dra mi rettferd i tvil, leggja skulda på meg så du kan få rett?

⁴ Har du så sterk ein arm som Gud, tornar røysta di som hans?

⁵ Så pryd deg då i stordom og velde, kled deg i høgd og herlegdom!

⁶Lat vreiden din rasa, slå alle hovmodige ned med ditt blikk!

⁷ Sjå på dei stolte og audmjuk dei, trakk dei urettferdige ned der dei står!

⁸ Løyn dei alle i støvet, steng dei inne i mørkret!

⁹ Då ville også eg prisa deg for den sigeren du vann med di høgre hand.

¹⁰ [45] Sjå Behemot: Eg skapte både henne og deg. Ho et gras som ein okse.

¹¹Sjå for ei kraft ho har i hoftene, og for ein styrke i bukmusklane!

¹²Ho strekkjer ut halen, stiv som ein seder, og lårsenene er fast fletta.

¹³Beina er som bronserøyr, knoklane som jernstenger.

¹⁴ [46] Ho er Guds fremste verk, av skaparen fekk ho sitt sverd.

¹⁵Fjella gjev henne føde, alle villdyra leikar der.

¹⁶Ho kviler under lotusplanter, i ly av siv og sump.

¹⁷Lotusen gjev skugge, piletrea ved elva omgjev henne.

¹⁸Om elva fossar, er ho like roleg, trygg sjølv når Jordan brusar mot gapet hennar.

¹⁹Kven torer openlyst angripa henne og dra ei snor gjennom nasen?

²⁰ [47] Kan du dra Leviatan opp med krok og halda tunga hans nede med band?

²¹Kan du setja sivreip i nasen på han og stikka ein krok gjennom kjevane?

²²Vil han då trygla deg om nåde eller tala blidt til deg?

²³ Gjer han pakt med deg så du kan ta han som slave for alltid?

²⁴Kan du leika med han som med ein fugl, leia han i band til småjentene dine?

²⁵Kjøpslår handelsmenn om han, stykkjar dei han ut mellom kjøpmenn?

²⁶Kan du fylla huda hans med spyd, hovudet hans med harpunar?

²⁷Legg du hand på han, får du ein kamp du vil hugsa og ikkje vil ha igjen.

²⁸Då blir håpet ditt til skamme. Du blir slegen ned straks du ser han.