Read nynorsk 2011 Job 41 Bible Online

Job 41 - nynorsk 2011 bible

Job 41

¹ [48] Ingen er så uvørden at han vekkjer Leviatan. Kven kan då stå seg mot meg?

² Kven gav meg noko først så eg skulle gje han noko att? Alt under himmelen tilhøyrer meg!

³ [49] Eg vil ikkje teia om Leviatan, om styrken hans og den staselege skapnaden.

⁴Kven kan riva av han skinnet eller trengja inn i det doble panseret hans?

⁵Kven kan opna gapet på han? Det står skrekk av tanngarden hans!

⁶Langs ryggen går rekkjer av skjold, lukka tett som med segl.

⁷Det eine ligg inntil det andre, ikkje ein pust kjem inn mellom dei.

⁸Skjolda heng fast i hop, grip inn i kvarandre og kan ikkje skiljast.

⁹Lys strålar fram når han nys, auga hans er som morgonròden.

¹⁰ Frå gapet hans går logar av eld, gneistar sprutar fram.

¹¹Røyk kjem frå naseborene som frå ei kokande gryte over brennande siv.

¹²Pusten hans set kol i brann, ein flamme står ut or gapet.

¹³Styrke har han i nakken. Redsle hoppar framfor han.

¹⁴Kjøtvalkane er faste, dei sit som støypte, dissar ikkje.

¹⁵Hjartet hans er fast som stein, fast som den nedste kvernsteinen.

¹⁶ Når han reiser seg, grøssar gudane, dei er lamma av redsle.

¹⁷Om sverdet treffer, bit det ikkje på han, og heller ikkje kastevåpen, spyd eller pil.

¹⁸Han aktar jern som var det strå og bronse som morkna tre.

¹⁹Inga pil frå bogen kan jaga han. Stein frå slyngja er som halmstrå mot han.

²⁰Som halmstrå reknar han også klubba, og han ler mot susande sablar.

²¹Under er han som kvasse potteskar, han set spor som ein treskjeslede i gjørme.

²² Han set djupet i kok som ei gryte, lèt havet bobla som salve i gryta.

²³Bak han ligg lyset som ein stig, som om havdjupet hadde fått sølvhår.

²⁴Ingen på jorda er som han, skapt heilt utan frykt.

²⁵Han set blikket i alt som er høgt, han er konge over alle stolte rovdyr.