Read nynorsk 2011 Job 5 Bible Online

Job 5 - nynorsk 2011 bible

Job 5

¹ Rop berre! Er det nokon som svarar? Kven av dei heilage vender du deg til?

²Uro tek livet av den dumme, sinne drep den godtruande.

³ Eg såg den dumme slå rot, men brått måtte eg forbanna bustaden hans.

⁴ [14] Borna hans var verjelause, knuste i porten, og ingen hjelpte dei.

⁵ [15] Dei svoltne åt opp avlinga hans, tok henne, endåtil mellom tornar; og dei tørste greip etter godset hans.

⁶For ulukke skyt ikkje opp av støvet, og liding gror ikkje opp av jorda.

⁷ Men mennesket er fødd til liding, gneistar som flyg høgt i vêret.

⁸Sjølv ville eg heller ha vendt meg til Gud, ja, til han ville eg ha overgjeve mi sak,

⁹ han som gjer storverk ingen kan granska, og under ingen kan telja.

¹⁰ Han gjev regn over jorda, sender vatn ut over åker og eng.

¹¹ Han reiser dei nedbøygde opp, reddar og tryggjar dei sørgjande.

¹² Han knuser planane til dei listige, deira verk lukkast ikkje.

¹³ Han fangar dei vise i deira list, snedige planar er forhasta.

¹⁴ Om dagen møter dei mørker, ved middagstid famlar dei som om natta.

¹⁵Så reddar han den fattige frå dei mektiges sverd, munn og hender.

¹⁶ Då blir det håp for den svake. Vondskapen lèt att sin munn.

¹⁷ Sæl er den som Gud viser til rette. Du skal ikkje forakta formaning frå Den veldige!

¹⁸ For han sårar, og han bind om såra. Han knuser, og hans hand lækjer.

¹⁹ Gjennom seks trengsler bergar han deg, og i den sjuande skal ulukka ikkje nå deg.

²⁰ I uår friar han deg frå døden og i krig frå kvasse sverd.

²¹ Du er trygg for stikkande tunge og fryktar ikkje komande ulukke.

²²Du ler av ulukke og hungersnaud og fryktar ikkje dyra på jorda.

²³ For du har ei pakt med steinane på marka. Villdyra held fred med deg.

²⁴Du får oppleva fred i telta dine, når du går over eigedomen, manglar du ingen ting.

²⁵Du får oppleva at ætta veks, etterkomarane dine blir som gras på jorda.

²⁶ Du går i grav i mogen alder slik kornband blir samla i rett tid.

²⁷Ja, dette har vi granska, og slik er det. Høyr det og ta det til deg!