Read nynorsk 2011 Job 7 Bible Online

Job 7 - nynorsk 2011 bible

Job 7

¹Har ikkje mennesket ein strid på jorda, eit liv som dagane til ein leigekar?

²Han liknar ein tenar som stønnar etter skugge, ein dagarbeidar som ventar på løn.

³ Månader i det tomme vart min lott, netter med liding min lagnad.

⁴Så snart eg legg meg, spør eg: «Når kan eg stå opp?» Natta blir lang, til det lysnar, er eg full av uro.

⁵ Kroppen er dekt med makk og sårskorper. Støvet gror fast i huda, og det verkjer.

⁶ Dagane går fortare enn ein vevskyttel, dei går til ende utan håp.

⁷ Hugs at livet mitt er ein pust! Aldri meir får eg sjå lukke.

⁸Auget som vaktar meg, ser meg ikkje lenger. Retter du auga mot meg, er eg der ikkje.

⁹ Ei sky løyser seg opp og kverv, og den som fer ned til dødsriket, stig aldri opp.

¹⁰ Han kjem aldri att til sitt hus, heimstaden kjenner han ikkje.

¹¹ Så legg eg heller ikkje band på min munn. Eg vil tala med angst i anden, klaga i bitter sjelekval.

¹² [16] Er eg eit hav eller eit sjøuhyre sidan du set vakt over meg?

¹³Eg seier: «Leiet får vera mi trøyst, lat senga bera mi klage.»

¹⁴Då skremmer du meg med draumar, med syn gjer du meg redd.

¹⁵Aller helst vil eg kvelast. Heller døden enn denne kroppen!

¹⁶ Eg vil ikkje, vil ikkje leva for alltid! Lat meg vera! Dagane mine er forgjengelege.

¹⁷ Kva er eit menneske sidan du aktar det så høgt og bryr deg så mykje om det?

¹⁸Du granskar det kvar morgon, prøver det kvar stund.

¹⁹ Kvifor vender du ikkje auga dine frå meg og gjev meg ro til å svelgja spyttet?

²⁰ Om eg syndar, kva gjer det deg, du som vaktar mennesket? Kvifor gjer du meg til skyteskive? Har eg vorte ei bør for deg?

²¹Kvifor tilgjev du ikkje mi synd og ber over med mi skuld? No må eg leggja meg i støvet; leitar du etter meg, er eg ikkje meir.